Талғар ауданында Алматы облысының полиция қызметкерлері арасында бокстан аймақтық жарыс өтті. Құқық қорғау ұйымдары қызметкерлерінің кәсіби даярлығын арттыруға бағытталған бұл турнир жоғары деңгейде ұйымдастырылып, өңірлердегі үздік спортшылардың басын қосты. Жарысқа Алматы облысының аудандық және қалалық басқармаларынан 150-ден астам полиция қызметкері және Жетісу облысының өкілдері қатысты.
Соңғы жылдары аймақта спортты дамытуға, оның ішінде құқық қорғау ұйымдары қызметкерлерінің дене шынықтыру даярлығын арттыруға ерекше көңіл бөлінуде. Мұндай жарыстар полиция қызметкерлерінің кәсіби біліктілігін арттырып қана қоймай, сонымен бірге олардың арасындағы өзара ынтымақтастықты да нығайтады. Бұдан басқа, бұл іс-шаралар қызметкерлердің жауынгерлік дайындығын арттырады және күнделікті жұмыста қажетті дағдыларды дамытуға ықпал етеді.
Ұйымдастырушылардың айтуынша, бокс – полиция қызметкерлерінің дене даярлығында ерекше маңызға ие. Спорттың бұл түрі күш пен төзімділікті ғана емес, сондай-ақ реакцияның жылдамдығын, тактикалық ойлауды, психологиялық тұрақтылықты және стрессті жағдайларда тез шешім қабылдау қабілетін дамытады. Мұндай қасиеттер құқық қорғау саласында жұмыс істейтін мамандар үшін өте маңызды. Қоғамдық тәртіпті сақтау кезінде олар түрлі жағдайлармен бетпе-бет келіп, тез әрі дұрыс шешім қабылдауы тиіс. Осы тұрғыда аймақтық іріктеу жарыстары мықты спортшыларды анықтаудағы маңызды кезеңге айналды. Турнир нәтижесінде мамыр айының ортасында Қарағандыда өтетін Қазақстан Республикасы Ішкі істер министрлігінің чемпионатына қатысу үшін біріккен команда құрылды. Бұл жарыстар республикалық деңгейде аймақтың намысын қорғайтын үздіктерді анықтауға мүмкіндік берді.
Алматы облыстық полиция басқармасы бастығының орынбасары Әсет Табеев жарыстың маңыздылығына тоқтап, мұндай турнирлердің кәсіби даярлықта ерекше орын алатынын атап өтті.
– Дене шынықтыру дайындығы – полиция қызметкерлері қызметінің ажырамас бөлігі саналады. Бокс – рухты нығайтады және әркімнің өзіне деген сенімін арттырады. Сонымен қатар, жарыс командалық рухты нығайта түседі, тәртіп пен жеке шеберлікті ұдайы жетілдіруге деген ұмтылысты арттырады, – деді ол турнирдің ашылу рәсімінде айтқан құттықтау сөзінде.
Жарыс 60-тан 90 келіге дейінгі сегіз салмақ дәрежесінде халықаралық бокс ережелеріне сәйкес, олимпиадалық жүйе бойынша ұйымдастырылды. Әр жекпе-жек жоғары қарқынмен өтіп, қатысушылар өз дағдыларын толық көрсетуге тырысты. Рингтегі жан алысып, жан беріскен көптеген шайқас көрермендерге ерекше әсер сыйлады. Қатысушылар дене күшін ғана емес, тактикалық шеберлігін де көрсетті. Кейбір жекпе-жектер соңғы секундқа дейін созылып, жеңімпаз тек қана төрешілердің шешімімен анықталды. Мұның бәрі жарыстың жоғары деңгейін көрсетеді.
Әсіресе 70 келі салмақта жеңімпаз атанған Іле ауданының өкілі Мирас Шарипов ерекше шеберлігімен көзге түсті. Жойқын соққы алмасулар кезінде ол өзінің жоғары техникалық дайындығы мен сенімді қорғанысын көрсетті. Соның арқасында барлық қарсыластарын айқын басымдықпен жеңді. Турнир туралы пікір білдіргенде, бұл жарыстар оның қызметтік дайындығының бір бөлігі екенін атап өтті. Оның айтуынша, бокс – құқық қорғау ұйымдарының қызметкерлеріне әрқашан жинақы, шапшаң және күшті болуға көмектеседі.
Сондай-ақ өз салмақ дәрежесінде Мұхаммед Омар, Нұрсұлтан Малов, Дулат Нұрдәулетов, Айбек Меденов, Әбдек Қанатбеков, Айбек Ахметов және Нияз Абдуханиевтер жеңімпаз атанды. Бұл спортшылар да жарыс кезінде жақсы техникалық және тактикалық дайындықтарын көрсетіп, жеңіс тұғырына көтерілді.
Жарыстың тағы бір ерекшелігі – қатысушылардың спорттық рухының жоғары деңгейі десек, артық болмас. Барлық жекпе-жек достық және адал жарыс атмосферасында өтті. Қатысушылар бір-біріне құрмет көрсетіп, жарыс аяқталғаннан кейін қарсыластарын құттықтады. Бұл да полиция қызметкерлері арасындағы бірлік пен кәсіби мәдениеттің жоғары деңгейін көрсететін бір дерек.
Талғар ауданында өткен бұл турнир полиция қызметкерлерінің кәсіби даярлығын арттыруға бағытталған маңызды оқиға болды. Мұндай жарыстар қызметкерлердің дене бітімін нығайтып қана қоймай, психологиялық төзімділігін де арттырады. Өңірлердегі спортты дамытуға және полицейлер арасында салауатты өмір салтын насихаттауға ықпал етеді. Сонымен қатар, жалпы спорт – құқық қорғау ұйымдары қызметкерлерінің командалық бірлігін нығайтады.
Жарыс қорытындысы бойынша республикалық чемпионатқа жолдама алған үздік спортшылар анықталды. Енді олар Қарағандыда өтетін Қазақстан Республикасы Ішкі істер министрлігінің чемпионатында Алматы облысының намысын қорғайтын болады. Бұл кезеңде қатысушылар үшін жауапкершілік арта түседі. Өйткені, республикалық жарыстарға еліміздің барлық өңірлерінен мықты спортшылар қатысады.
Өздерінің кәсіби міндеттері мен бірге спортта да жақсы жетістіктерге жетіп жүрген облысымыздың құқық қорғау ұйымдарының қызметкерлері кеншілер қаласындағы жарыста да жоғары нәтижелер көрсетеді деп сенеміз.
Құтмағамбет ҚОНЫСБАЙ
Талғар ауданы
