Алматы облысы бойынша Сауда және тұтынушылардың құқықтарын қорғау департаменті қарауына келіп түскен азаматтардың өтініштерін қарау барысында кезекті оң нәтиже тіркелді. Бұл жолы даулы мәселе қымбат тұрмыстық үй кинотеатры жинағын сатып алу кезінде туындаған жағдайға қатысты болды.
Тұтынушы мамандандырылған дүкеннен құны 625 500 теңге болатын заманауи аудио-видео жүйесін сатып алған. Алайда пайдалану барысында алғашқы күндерден-ақ техникалық ақаулар анықталып, дыбыс пен бейне сапасы өндіруші көрсеткен сипаттамаларға сәйкес келмеген.
Өзінің заңды құқығын пайдаланған тұтынушы сатушыға тауарды сапалы ұқсас тауарға ауыстыру немесе төленген ақшалай қаражатты толық көлемде қайтару туралы талап қойған.
Алайда кәсіпкер тұтынушының заңды талабын орындаудан бас тартып, дауды шешу процесін созған.
Өз құқықтарының бұзылғанын түсінген азамат көмек сұрап уәкілетті органға жүгінді. Өтінішті қарау барысында Департамент мамандары Қазақстан Республикасының «Тұтынушылардың құқықтарын қорғау туралы» Заңының нормаларын басшылыққа алды.
Атап айтқанда, аталған Заңның 15-бабына сәйкес сапасыз тауар сатылған жағдайда тұтынушы өз таңдауы бойынша:
тауарды ауыстыруды;
сатып алу бағасын тиісінше төмендетуді;
шартты бұзып, төленген соманы қайтаруды талап етуге құқылы.
Сондай-ақ Заңның 30-бабына сәйкес сатушы (дайындаушы) тұтынушының сапасыз тауарды қайтару немесе айырбастау туралы талабын ол қойылған сәттен бастап қанағаттандыруға міндетті.
Өтінішті қарау барысында Департамент мамандары кәсіпкерге заң талаптарын жан-жақты түсіндіріп, оларды орындамаған жағдайда әкімшілік жауапкершілік қарастырылғанын ескертті.
Жүргізілген түсіндіру жұмыстарының нәтижесінде кәсіпкер өз қателігін мойындап, дау сотқа дейінгі тәртіппен шешілді. Нәтижесінде тұтынушыға 625 500 теңге көлеміндегі толық қаражат қайтарылды.
Департамент өкілдерінің айтуынша, бұл жағдай азаматтардың өз құқықтарын білуі мен оларды қорғауда белсенді ұстаным танытуының маңыздылығын тағы бір мәрте дәлелдейді. Қазақстан Республикасының «Тұтынушылардың құқықтарын қорғау туралы» Заңының 7-бабына сәйкес әрбір тұтынушы өзінің заңды құқықтары мен мүдделерін қорғауға құқылы.
Алматы облысы бойынша Сауда және тұтынушылардың құқықтарын қорғау департаменті азаматтарды құқықтары бұзылған жағдайда ресми түрде жүгінуге шақырады. Халыққа құқықтық қолдау көрсету және тұтынушылардың құқықтарын қорғау бағытындағы жұмыстар алдағы уақытта да жалғасатын болады.
Дина Адилхановна
ҚР Сауда және интеграция министрлігінің
Алматы облысы бойынша сауда және
тұтынушылардың құқықтарын қорғау
департаментінің бас маманы
