12–20 мамыр аралығында Балқаш ауданына облыстық денсаулық сақтау басқармасының басшысы Ержан Сүлейменовтың бастамасымен жоғары білікті мамандардан құралған мобильді топ келген болатын. Аталған мобильді топ мамандары Ресейдің Санкт-Петербург қаласында біліктілігін арттырып, тәжірибе жинақтаған. Мобильді топ сапарының негізгі мақсаты — халыққа медициналық көмектің қолжетімділігі мен сапасын арттыру, сондай-ақ ауданымыздың медициналық ұйымдарына емдік-практикалық және ақпараттық қолдау көрсету.
Арнайы мобильді топ құрамындағы педиатр Ж. Жамбылова, балалар нейрохирургы Р. Ахмаров, психиатр А. Ақшалова, неонатолог Ж. Ағамұрадова, жалпы практикалық дәрігер Л. Нұрмұхамет, травматолог А. Халмұратов, хирург А. Оразбаев, акушер-гинеколог Д. Қойжігітовалар шалғай орналасқан ауыл тұрғындарына сапалы медициналық қызмет көрсетіп, қабылдау жұмыстарын жүргізді.
Сонымен қоса, тұрғындарға білікті мамандардың кеңестері беріліп, қажетті медициналық скринингтер ұйымдастырылып, аудандық Орталық ауруханада күрделі оталар жасалды. Одан бөлек күрделі диагноздар бойынша консультациялар өткізіліп, жоғары технологиялық, медициналық көмектер көрсетілді.
Осы орайда аудан әкімінің орынбасары Данияр Нұрманов облыстың әр аймағынан келген мобильді топ дәрігерлеріне Балқаш ауданы әкімі Азат Құтпанбетовтың алғыс хаттарын табыстап, аудан әкімдігі атынан топ мүшелеріне жылы лебізін білдірді.
Осылайша Балқаш ауданына арнайы келген мобильді топ дәрігерлерінің арқасында бірқатар тұрғынға медициналық көмек қолжетімді бола түсіп, күрделі ота үшін облыс орталығына баруға мәжбүр болатын науқастарға ота аудан орталығында жасалды.
Алтынай Сейіткен
Балқаш ауданы
