Алматы облысының кәсіпкерлер палатасында жылжымайтын мүліктің бірыңғай мемлекеттік кадастрын (ЖМБМК) Қазақстанға енгізу, сондай-ақ Жария кадастрлық картаның тұсаукесерін өткізу мақсатында бизнес субъектілерімен түсіндірме жиыны өткізілді. Келешекте жер қатынастары саласындағы барлық мемлекеттік қызметтер жер ресурстары мен жылжымайтын мүліктің бірыңғай базасын өзектендіру арқасында онлайн жүзеге асырылатын болады.
Кездесу Алматы облысы “Атамекен” ҚР ҰКП филиалында Алматы облысы бойынша “Азаматтарға арналған үкімет” филиалы өкілдерінің қатысуымен өткізілді. Түсіндірме жұмыстарын жүргізу мақсатында кездесуге Мемлекеттік корпорацияның Басқарма төрағасының орынбасары Ғалым Қарқынбаев пен департамент директоры Қуат Сағадиев шақырылды.
«Жердің барлық санаттарын беру “жылжымайтын мүліктің бірыңғай мемлекеттік кадастры” республикалық ақпараттық жүйесінде және 17 “Өңірлік геоақпараттық жүйелерде” іске асырылатын болады. Жаңа тәртіп жер учаскесіне құқық алуға мүдделі жеке және заңды тұлғалардың “электрондық үкімет” веб-порталы арқылы өтінім беруін көздейді. Ол жария кадастрлық картада сұралып отырған жер учаскесіне бөлу схемасын дербес қалыптастырады»,- деді Мемлекеттік корпорация филиалы директорының орынбасары Алмаз Батыралиев.
Қазақстанда жылжымайтын мүліктің бірыңғай мемлекеттік кадастрын енгізудің мақсаты жер учаскелерін беру тәртібінің рәсімдерін оңайлату, жер қатынастары саласындағы қызметтерді өзектендіру арқылы қызмет алушылардың лауазымды тұлғалармен өзара іс-қимылын барынша азайту, сондай-ақ халыққа көрсетілетін қызметтердің сапасын жақсарту болып табылады.
Кездесу барысында бизнес субъектілері өздерін қызықтырған сұрақтарға жауап ала отырып, электрондық жүйені және коммерциялық мақсатта жер беру рәсімдерін жетілдіру жөнінде ұсыныстар айтты.
