Іле ауданында ауыл шаруашылығы алқаптарын зиянкестерден қорғау бағытындағы ауқымды химиялық өңдеу жұмыстары жалғасуда. Биыл аудан аумағында шегіртке тұқымдастарына қарсы жалпы көлемі 25 395 гектар жер дәріленеді.
Жоспарға сәйкес, саяқ шегірткеге қарсы 15 795 гектар аумақ қамтылса, оның 8 000 гектары әуе техникасымен, 7 795 гектары жер үсті техникасымен дәріленеді.
Сонымен қатар, үйірлі шегірткеге, оның ішінде итальяндық прусқа қарсы 9 600 гектар жерге химиялық өңдеу жүргізу жоспарланған. Оның 6 800 гектары әуе техникасымен, 2 800 гектары жер үсті техникасымен атқарылады.
Қазіргі таңда, Қараой ауылдық округінде жұмыстар қарқынды жүруде.
Бүгінгі күнге дейін жер үсті техникасымен 3 320 гектар, әуе техникасымен 2 990 гектар, жалпы көлемі 6 310 гектар жер өңделді.
Сондай-ақ, итальяндық прусқа қарсы 1 800 гектар аумаққа химиялық өңдеу жүргізілді.
Аталған жұмыстар күн сайын таңғы сағат 04:00-ден бастап Іле ауданының ауыл шаруашылығы бөлімінің басшысының тікелей қадағалауымен жүзеге асырылуда.
Фитосанитарлық қауіпсіздік — ауданның тұрақты бақылауындағы маңызды бағыттардың бірі.




