2026 жылғы 1 шілдеден бастап Қазақстанда электросамокаттарды пайдалану тәртібіне қатысты жаңа талаптар күшіне енді. Бұл өзгерістер жолдағы қауіпсіздікті арттыру және жол-көлік оқиғаларының алдын алу мақсатында енгізіліп отыр.
Енді жалға берілетін электросамокаттарды пайдалану үшін азаматтың жасы 18-ге толуы керек. Сонымен қатар, самокатты жүргізу үшін жарамды жүргізуші куәлігі де талап етіледі. Бұл талаптар әрбір пайдаланушының жауапкершілігін арттыруға бағытталған.
Жаңа өзгерістердің тағы бір маңызды тұсы – жалға берілетін электросамокаттарды тіркеу және сәйкестендіру жүйесінің енгізілуі. Бұл жүйе арқылы құқық бұзған адамдарды анықтау оңайырақ болады. Соның арқасында тәртіп бұзушылар жауапкершіліктен жалтара алмайды.
Осыған байланысты Ұйғыр ауданында да тұрғындарға жаңа талаптарды түсіндіру жұмыстары қарқынды жүргізілуде. Аудандық полиция қызметкерлері мен жауапты мамандар тұрғындармен кездесулер өткізіп, жол қозғалысы ережелерін сақтау, электросамокаттарды дұрыс пайдалану және заң талаптарын бұзбау жөнінде кеңінен ақпарат беруде. Сонымен қатар, халық көп шоғырланатын орындарда түсіндіру парақшалары таратылып, алдын алу шаралары ұйымдастырылуда.
Ережелерді сақтамағандар әкімшілік жауапкершілікке тартылады. Мысалы, жол ережесін бұзу, мас күйінде самокат жүргізу немесе қарсы бағытта жүру сияқты әрекеттер үшін заң бойынша айыппұл немесе басқа да шаралар қолданылуы мүмкін.
Жалпы алғанда, жаңа талаптар жолдағы тәртіпті күшейтіп, адамдардың қауіпсіздігін қамтамасыз етуге бағытталған. Сондықтан әрбір азамат осы ережелерді сақтап, өз қауіпсіздігі мен айналасындағылардың амандығына жауапкершілікпен қарауы қажет.