Қазақстандық Әсем Орынбай мен Эдуард Ещенко стенд ату турнирінің аралас жұптық сайысында алтын медаль жеңіп алды. Сайыстың ақтық сынында қазақстандықтар Кувейттен келген қарсыластарынан озық болды. Бұл – Азиададағы еліміздің ұлттық құрамасы жеңіп алған үшінші алтын медаль. Естеріңізге сала кетейік, кеше Әсем Орынбай, Зоя Кравченко және Ольга Панаринадан жасақталған Қазақстанның әйелдер командасы стенд атудан алтын медаль жеңіп алып, Азия ойындарының рекордын орнатқан. Ал жекелей сында Әсем Орынбай қола жүлдеге ие болды.
“Біздің мергендер тағы да керемет нәтиже көрсетті! Спортшыларды, жанкүйерлерді және әрине, команданың жаттықтырушылар штабын осы жеңіспен құттықтаймын. Бүкіл ел мергендерімізді мақтан тұтады. Бұл жеңіс мыңдаған қазақстандық жеткіншекті осы спорт түрімен айналысуға шабыттандыратынына сенімдімін”, – деді Қазақстанның Туризм және спорт министрі Ермек Маржықпаев.
Әсем Орынбай – Алматы облысының Іле ауданы Ынтымақ ауылының тумасы. Халықаралық дәрежедегі спорт шебері. 2018 жылғы Азия біріншілігінің күміс жүлдегері, 2021 жылы Каирде өткен әлем біріншілігінде қола медаль жеңіп алған.
