Алматы әуежайында ХІХ Азия ойындарының чемпиондары мен жүлдегерлерін салтанатты түрде қарсы алу шарасы өтті. Облыстан шыққан спортшылар Әсем Орынбай, Эдуард Ещенко мен Аян Тұрсын Азия аламанында өңірдің ғана емес, бүкіл Алаш жұртының абыройын асқақтатып қайтты.
Ел мақтаныштары 2023 жылдың 23 қыркүйегі мен 8 қазаны аралығында Қытайдың Ханчжоу қаласында өтіп жатқан Азия ойындарына қатысып, Қазақстан даңқын көкке көтерді. Атап айтқанда, әлемдік сайыстардың жеңімпазы Әсем Орынбай мен Эдуард Ещенко алтыннан алқа тағынды. Қазақстандық сұрмергендер Кувейттен келген қарсыластарынан басым түсіп, үздіктердің арасынан топ жарды. Қазақстан әйелдер құрамасы сапында да Әсем Орынбай жерлестері Ольга Панаринамен, Зоя Кравченкомен бірге алтын медаль жеңіп алып, Азия ойындарында рекорд орнатты. Жекелей сында Әсем Орынбай тағы оза шауып, қола жүлдегер атанды. Осылайша, мақтан тұтар қызымыз Әсем Орынбай бүкіл қазақ елінің қошемет-құрметіне бөленді.
Облыстың тағы бір спортшысы Аян Тұрсын ушу-саньда сайысында үздік үштікті түйіндеді. Аян Тұрсын Азия ойындарында 52 келіге дейінгі салмақта жартылай финалға дейін жетті. Сөйтіп, қытайлық Юйейао Лиге есе жіберіп, қола жүлдені қанжығасына байлады.
Айта кетейік, Азия ойындарында Қазақстан құрама командасы сапында облыстан барлығы 10 спортшы қатысуда. Алда әлі әйелдер күресінен Марина Седнева мен джиу-джитсудан Мариан Ордабаеваның өнері бар. Облыстың қос саңлағы 5 және 7 қазанда сайысқа шығады.
Азия ойындары – төрт жылда бір рет өтетін, Азия елдерінің спортшылары ғана қатыса алатын кешенді жарыс болып саналады. Қазақстан құрамасы Азия ойындарына 1994 жылдан бері сегізінші рет қатысып отыр.
ӨЗ ТІЛШІМІЗ
