XIX Азия ойындарында ерекше көзге түскен спортшыларымыздың бірі – мерген қыз Әсем Орынбай. Ол стенд атудан екі бірдей жүлдеге қол жеткізді. Бір алтын, бір қола медальді иеленді. Сөйтіп, ел мерейін асыруға өз үлесін қосты.
Жуырда Азиада жеңімпаздарын ел Президенті Қасым-Жомарт Тоқаев арнайы қабылдады. Салтанатты шарада сөз алған Әсем Орынбай Азия ойындарында жүлде оңай келмегенін атап өтті. «Біз жеңіске жету үшін бар күшімізді салдық. Бұған жаттықтырушылардың сіңірген еңбегі зор. Жеткен жеңіс – ортақ табысымыз», – деді чемпион. Мерген қыз алдағы Олимпиада ойындарына жолдама алу үшін аянбай тер төгетінін айтты. Сонымен қатар тағы бір қуанышын паш етті. «Құрметті Қасым-Жомарт Кемелұлы, спорттың арқасында мен өмірлік серігіммен кездестім. Ол да спортшы, амандық болса, қараша айында үйлену тойымыз болады. Соған сізді құрметті қонақ ретінде шақырамыз», – деді Әсем Орынбай. Кездесуден кейін мерген қызбен хабарласып, аз-кем әңгімелестік.
– Әсем, бұл спорт түріне қалай келдіңіз?
– Стенд ату спортымен 15 жасымнан бастап айналыстым. Оған әкемнің ықпалы көп тиді. Ол кісі балықшылықты, аңшылықты өте жақсы көретін. Мені қасынан қалдырмайтын. Кейін кәсіпқой стенд ату спортымен біржолата шұғылдандым. Көптеген жарыстарға қатысып, жеңімпаз атандым. Азиадаға баратын кезде Шымкент қаласында дайындалдық. Тыңғылықты жаттығып, физикалық және рухани жағынан барынша шыңдалдық. Азия ойындарында ең мықты қарсылас қытайлық және үндістандық мергендер болды. Біз бапкерлеріміз Сергей Колосов пен Владислав Мұхамадиевтің берген тапсырмаларын мұқият орындап, ел үмітін ақтауға ұмтылдық. Нәтижесі өздеріңізге белгілі.
– Алдағы уақытта қандай жоспарыңыз бар?
– Аздаған демалыстан соң Оңтүстік Кореяда өтетін жарысқа қатысамыз. Онда Олимпиада жолдамасы сарапқа салынады. Сол байрақты бәсекеде Көк Туымызды желбіретсек деген үлкен мақсатты көздеп отырмыз.
– Өмірлік серігіңіз туралы айта кетсеңіз?
– Ол кісі туралы әзірше ашып ештеңе айтпай-ақ қояйын. Екеуміз бір командада өнер көрсетеміз. Қалған жаңалықты алдағы уақытта ести жатарсыздар.
Айта кетейік, Қытайдың Ханчжоу қаласында өткен Азия ойындарында ең алғашқы алтын медальді стенд атудан Іле ауданы Ынтымақ ауылының тумасы Әсем Орынбай иеленген еді. Осы сайыста жүлдеге қол жеткізген тағы бір жерлесіміз Эдуард Ещенко – Өтеген батыр ауылының перзенті. Мергендердің Олимпиада ойындарына қатысып, жеңіс тұғырынан көрінуіне тілектеспіз!
Бағдат Шойбас,
Іле ауданы
