Қонаев қаласында жарты миллиард теңгеге жуық қаржы бөлінген инфрақұрылым желілерін тарту жұмыстары толық аяқталмай, тоқтап тұр. Қала әкімдігі баспасөз қызметінің хабарлауынша, мердігер компания былтырдан бері 7 шақырымдық кәріз жүйесінің жартысын ғана тартқан.
“Былтыр қазан айында Қонаев қаласындағы Гүлдер, Қарлығаш шағын аудандарында сумен жабдықтау және су бұру желілерін қайта жаңарту жұмыстары басталған. Оған бюджеттен 481 млн 645,8 мың теңге қаржы қарастырылған. Аталған жұмыс бойынша 17.8 шақырым су құбыры, 7.13 шақырым кәріз құбыры тартылуы керек. Құрылыс-монтаждау жұмыстарымен «Шах» ЖШС айналысып жатыр. Қазіргі таңда су құбыры 100 пайыз тартылған, ал кәріз құбыры бойынша жұмыстың 50 пайызы аяқталған”, – деп хабарлады қала әкімдігінің баспасөз қызметі.
Алайда, мердігер ұйым белгілі бір себептерге байланысты жұмысты уақытша тоқтатқан. Бұған дейін қалалық әкімдіктің тұрғын үй коммуналдық шаруашылығы бөлімі компанияның үстінен 2 рет талап арыз жазған. Егер келісімшартта көзделген уақытта серіктестік істі аяқтамаса, бөлім сотқа жүгінбек. Бұл шешім тұрғындардың толассыз шағымынан кейін шығарылды. Сондай-ақ мердігердің жұмысы әкімдіктің бақылауына алынды.
