Биыл қараша айында Мемлекет басшысы Қасым-Жомарт Тоқаев мемлекеттік қызметшілерге, құқық қорғау органдарының қызметкерлеріне және әскери қызметшілерге қызмет бабынан басқа жағдайда ойын мекемелеріне баруға тыйым салатын тиісті Жарлыққа қол қойды.
Алматы облысының мемлекеттік қызметшілерін осы өзгерістермен таныстыру мақсатында облыстың мпмлекеттік қызмет істері агенттігінің Алматы облыстық департаменті облыстың барлық мемлекеттік органдарының әдеп жөніндегі уәкілдерінің, Әдеп жөніндегі кеңес мүшелерінің және БАҚ өкілдерінің қатысуымен кездесу ұйымдастырды.
Кездесу барысында департамент басшысы Арсен Жакупов мемлекеттік қызметшілердің әдебін қамтамасыз етуде әдеп жөніндегі уәкілдер маңызды роль атқаратынын баса айтты.
Сондай-ақ, Арсен Жакупов қызметтік көлікті мақсатсыз пайдалану және жұмыс уақыты режимін сақтау мәселелері департаменттің ғана емес, қоғамның да қатаң бақылауында екенін айтты.
Департамент жұртшылықпен бірлесіп, жұмыс уақытын есепке алу мониторингі барысында білім басқармаларының, цифрлық технологиялардың және басқа да бірқатар мемлекеттік органдардың мемлекеттік қызметшілерінің үстеме жұмыс істегенін анықтады.
Кездесу қорытындысында әдеп жөніндегі уәкілдер өз ұжымдарында осындай іс-шараларды өткізуді және Әдеп кодексіндегі күшіне енген өзгерістерді әрбір мемлекеттік қызметшіге түсіндіру тапсырылды.
Еске салайық, әдеп жөніндегі уәкілдер мемлекеттік қызметшілердің қызметтік әдеп нормаларын сақтауын, мемлекеттік қызмет және сыбайлас жемқорлыққа қарсы іс-қимыл туралы заңнамаларын бұзушылықтардың алдын алуын қамтамасыз ету жөніндегі қызметті жүзеге асырады.
