Бүгін Қонаев қаласының әкімі Нұрлан Құматаев Тәуелсіздік күніне орай, желтоқсаншылармен кездесті, деп хабарлайды Қонаев қаласы әкімдігінің баспасөз қызметі.
Кездесу барысында шаһар басшысы еліміздің бүгінгі жетістігі еңселі егемендіктің арқасы екенін айтты.
«Жақында Түркияға іссапарамен барып келдім. Шетелдегі әріптестер бізді «Атажұрттан келдіңдер» деп, аса құрметпен қарсы алды. Алдағы уақытта келе жатқан Тәуелсіздік күні мерекесімен құттықтады. Сонау 1986 жылдан бері 37 жыл өтсе де, 16 желтоқсан ел есінде әлі жаңғырып тұр. Ерліктеріңіз ешқашан ұмытылмайды», – деді Нұрлан Құматаев.
Сонымен қатар ол Қонаев қаласы – Алматы облысының орталығы аталғаннан бері болған өзгерістер, алдағы жоспарлар жайлы сөз етті.
«Биыл қаланың Бас жоспары бекітілді. Жалпы қалада 189 іс-шара өтеді деп жоспарланған. Оның ішінде тұрғын үйлер, әлеуметтік нысандар салу, инженерлік желілерді тарту, жаңа жолдар салу секілді шаралар бар. Шаһарда 6 мектеп, 3 денсаулық сақтау нысаны, спорт-сауықтыру кешені, спорт кешені, мұз айдыны, медиа орталық, сауда және ойын-сауық кешендері және тағы басқа ғимараттар бой көтермек. Қаланың дамуы да, елдегі тұрақтылық та, барлығы – бостандықтың арқасы», – деді қала әкімі.
Жиынға қатысушылар болса, желтоқсаншыларға арнап монумент тұрғызылуы керек екенін айтып, ұсыныс тастады.
«Біздің қалада облысымыздың символы – барыс мүсіні қойылған. Одан бөлек, бірнеше тұлғаларымыздың муралдары, ескерткіштері бар. Биыл Жеңіс паркі күрделі жөндеуден өтті. Тарихтан сыр шертетін мұралардың болғаны, әрине, дұрыс. Сіздердің ұсыныстарыңыз жайында көптен бері ойланып, жер қарастырып жүрміз. Келешектің еншісіндегі жоспарда қарастырылған», – деді шаһар басшысы.
Басқосу соңында желтоқсаншылар кездесу ұйымдастырғаны үшін қала әкіміне алғысын жеткізді. Ал Нұрлан Құматаев оларға арнайы сый-сияпат, гүл шоқтарын табыс етті.
