Қонаев қаласының іргесіндегі “Құрылысшы” саяжайында 1240 жеке тұрғын үй бар, соның тек 400-ден астамы ғана электр қуатының ақшасын уақытылы төлеп отырады. Бұл туралы хабарлаған Қонаев қалалық әкімдігі баспасөз қызметінің дерегінше, қазіргі таңда халықтың 19 млн 842 мың теңгеден астам қарызы бар. Осыған байланысты былтыр 11 трансформатор орнатылса да, желінің қала балансына өту мәселесі шешілмеген.
Қонаев қаласының әкімі Нұрлан Құматаевтың төрағалығымен әкімдікте тұрғынүй коммуналдық шаруашылығы бөлімі мамандары, «АлатауЖарықКомпаниясы» АҚ өкілдері, саяжай кооперативі басшылары қатысқан жиын өтті. Басқосу барысында шаһар басшысы халықтың қарызы барына қарамастан, трансформаторларды іске қосуды тапсырды. Бұл тапсырма бір апта ішінде орындалмақ. Содан кейін абоненттер табиғи монополияларды реттеу департаментінің бекіткен тарифі бойынша тұтынған жарықтың құнын төлеп отырады. Алайда, берешегі бар тұрғындар электр желісіне кейінірек қосылады.
Тұрғынүй коммуналдық шаруашылығы бөлімі басшысының орынбасары Асхат Жексембековтің сөзінше, алдымен 11 трансформатордың 3-еуі ел игілігіне беріледі. Кейіннен кезең-кезеңімен қалған трансформаторлар жұмыс істей бастайды.
