Қазақстан Президенті Қасым-Жомарт Тоқаев баспасөз қызметкерлерін 2 ақпан – Ұлттық басылым күнімен құттықтады.
Былтыр маусым айында сол кезде Дархан Қыдырәлі Ақпарат және қоғамдық даму министрі болып тұрған кезде 2 ақпан – Ұлттық басылым күні болып бекітілген. Атаулы күн осыдан 111 жыл бұрын, 1913 жылдың 2 ақпанында бастауында Ахмет Байтұрсынұлы, Әлихан Бөкейханов, Міржақып Дулатұлы сынды ұлт зиялылары тұрған “Қазақ” газетінің алғашқы нөмірі жарық көруіне орай белгіленген.
«Құрметті баспасөз қызметкерлері! Баршаңызды Ұлттық басылым күнімен шын жүректен құттықтаймын! Сонау 1913 жылы, дәл осы күні еліміздің баспасөз саласының бастауында тұрған «Қазақ» газетінің алғашқы саны жарық көрді. Халқымыздың біртуар перзенттері – Алаш арыстары шығарған бұл басылым сындарлы сәттерде ұлтты ұйыстыруға айрықша ықпал етті. Сөз бостандығына адалдығынан айнымаған басылымдар әрдайым шынайы ақпараттың және сапалы сараптаманың қайнар көзі болып қала береді. Газет-журналдар замана тынысын дөп басып, мемлекет пен қоғамдағы қордаланған мәселелерді көтереді, түрлі көзқарастағы ой-пікірлерді жарыққа шығарады. Сондай-ақ жалпы адамзатқа ортақ ізгі құндылықтарды дәріптейді. Баспасөз қызметкерлері кәсіби біліктіліктің, отаншылдық пен жауапкершіліктің озық үлгісін көрсетіп келеді. Біздің басылымдарымыз халықтың бірлігін нығайтуға атсалысып, Әділетті Қазақстанды құру ісіне елеулі үлес қоса береді деп сенемін», – деді Президент құттықтауында.
Мемлекет басшысы сала мамандарына зор денсаулық, бақ-береке және шығармашылық шабыт тіледі.
Ұлттық баспасөз күні көршілес Ресей, Қырғызстан, Тәжікстан, Әзербайжан елдерінде де атап өтіледі. Атаулы мереке бұл елдерде алғашқы газеттердің жарық көрген күні баспасөз күні, БАҚ қызметкерлері күні ретінде белгіленген.
