Аудан орталығынан шалғайдағы Бесмойнақ ауылында тұратындар негізінен мал шаруашылығымен айналысады. Таулы аймақта төрт түлік өсірушілердің бірі – Қайрат Сәрсенбаев.
Ол осындағы жеке шаруа қожалығының төрағасы ретінде саланың дамуына өз үлесін қосып жүр. Тау қойнауына сұғына қоныстанған елді мекеннің тұрғындары қашаннан ерте тұрады. Сайлауға отбасымен ертелетіп келіп, дауыс берген азамат еліміздегі саяси оқиғаларға бей-жай қарамайды.
– Мемлекетіміз заман көшінен қалмай дамыса екен. Ол үшін билік тұтқасын ұстайтын азаматтар білікті, отаншыл, әділ болуға тиіс. Сондай адамдарды таңдап жатырмыз бүгін. Мен осында жұбайыммен, кішкентай қызымызды ерте келіп, өз таңдауымызды жасадық, – дейді Қайрат Сәрсенбаев.
Бесмойнақта да бұл күні саяси науқан белгіленген тәртіппен өтуде. Осындағы Жанкелдин атындағы орта мектептің ғимаратында орналасқан №311 сайлау учаскесі таңғы сағат 7-де жұмысын бастаған. Аталған комиссияның хатшысы Болат Нұрғалымовтың айтуынша, тіршілігі таң азаннан басталатын ауылдықтар дауыс беруге де ертелетіп келіп, белсенділік танытып жатыр екен. Әсіресе зейнеткерлер мен орта жастағылар саяси науқанның мән-маңызын жете түсініп, өз таңдауларын жасауда жастарға үлгі болуда. Мұндағы тіркелген сайлаушылар саны – 916. Оның ішінде екеуі денсаулығына байланысты үйден дауыс береді. Тізімде жасы он сегізге енді толған 6 азамат бар.
Серік САТЫБАЛДИЕВ
Жамбыл ауданы
