Ерте жүктіліктің алдын алу мақсатында Алматы облысында 24 – 28 маусым аралығында «Репродуктивті денсаулықты сақтау» апталығы өтіп жатыр. Бұл дегеніміз әрбір адамның жіті тексеруден өтіп, дәрігерден кеңес алуына берілген бірегей мүмкіндік.
Репродуктивті денсаулық апталығы – салауатты өмір салтын насихаттауға бағытталған.
Мұндай науқан кезінде мамандар жас буынның денсаулықты сақтауына, атап айтсақ, ерте жүктіліктің алдын алу, жасанды түсікке жол бермеу сынды жайттарға назарын аударады.
Талғар ауданының орталық ауруханасы басшысының орынбасары Нүргүл Матжанованың сөзіне сүйенсек, өңірде бойжеткендер арасында ерте жыныстық жетілу шамамен он алты жастан басталады. Ауыр дерек болғанымен ақиқаты осы. Өкінішке қарай, облыста ерте жүктілік жағдаяты тіркелген. Бүгінгі күні 15-18 жас аралығындағы 127 қыз жүкті болған.
Дабыл қағатындай жайтта дәрігерлер құзырлы органдармен және ата-анамен бірлесе отырып жұмыстарын атқарады. Бұл жасанды түсіктің алдын алуға мейлінше нәтиже беретін тәсіл саналады.
Маманның айтуынша, соңғы бес жылда ерте жүктілік 31 пайызға төмендесе, жасанды түсік жасату 28 пайызға азайған.
«Әйелдер арасында жатыр мойны обыры ерті асқынып тұр. Мұның барлығы ерте жыныстық жетілу, гигиена сақтамау сынды қарапайым ережелерді ескермеуден туындайы. Сол себепті, репродуктивті денсаулық апталығында жыныстық жолмен берілетін инфекциялардың алдын алу, адамдардың папиллома вирусына қарсы екпе туралы ақпарат бере бастадық. Ұлт саулығы ең басты қазына болуы тиіс. Апталықтың да негізгі мақсаты – салауатты, медициналық сауатты ұлтты қалыптастыру екенін еске саламын», – деп қорытындылады спикер.
