Алматы облысы Қарасай ауданының тұрғындары облыс әкімімен кездесуде газ бағасының қымбаттағанына наразылық танытты.
Тұрғындар газға қосылу бағасы 1 миллион теңгеге дейін, ал 1 текше метр газ құны 29,5 теңгеден 34,7 теңгеге қымбаттағанын айтады. Олар бұған дейін жергілікті әкімдік өкілдерімен бірнеше кездесу өткенімен, еш нәтиже шықпағанына қынжылып, газ тасымалдаушы «Сигма газ» компаниясының жұмысын тоқтатуды сұрады.
Облыс әкімі Марат Сұлтанғазиев бұл мәселеден хабардар екенін жеткізді.
«Сіздер қозғаған мәселе бойынша монополияға қарсы комитет тексеру жүргізді. Нәтижесінде, қызметтер тарифін бекітуге өтінім беру, тауарлық газдың сату бағасын белгілеу тәртібін сақтамау бойынша заңбұзушылықтар анықталып, айыппұл салынды. Қазір газ шаруашылықтарымен газ қостыру бағасын 350 мың теңгеге дейін төмендету туралы келіссөздер жүргізіліп жатыр», – деді әкім Сұлтанғазиев.
Ол сонымен қатар «Сигма газ» мәселені шеше алмаса, әкімдік басқа компания іздеуі керегін жеткізді.
Ал облыстық монополияға қарсы департамент ертең Шамалғанда газ мәселесіне байланысты қоғамдық тыңдалым өтетінін айтады.
Alatau News
