Еңбекшіқазақ пен Талғар аудандарының шекарасында орналасқан Азат ауылының маңындағы саяжайда 5 мыңға жуық адам тұрады. Талғарға баратын тура жол болмағандықтан, тұрғындар бірнеше шақырым жол жүруге мәжбүр.
Әсіресе, оқушыларға қиын болып тұр. Балалар мектепке бару үшін күнде 3 шақырым жолды жаяу жүріп өтеді. Себебі, саяжай мен Талғардың арасына қатынайтын қоғамдық көлік жоқ. Таксидің бағасы қымбат. Сондықтан тұрғындар талай жылдан бері құзырлы орындардан өзенге көпір салуды өтініп келеді. Көпір салынса, жол қысқарады. Балалар мектепке кешікпей барады.
Тиісті орындардан еш жауап болмаған соң, саяжайлықтар өз бетінше амалдап өткел салып алған. Алайда, оны кез келген уақытта су шайып кетуі әбден мүмкін. Өткелден арғы бетке өту де өте қауіпті.
Жуырда жергілікті әкімдік жаңа көпір салынатынын айтып, тұрғындарды жақсы жаңалығымен қуандырды.
«Жобалық-сметалық құжаттама дайындалды. Биыл жаңа көпір салынады, – деді Рахат ауылдық округі әкімінің орынбасары Руслан Қыдырқожаев.
Ерзат Асыл
Еңбекшіқазақ ауданы
