Астанада өткен ауыл мектептері оқушыларына арналған республикалық олимпиадада Еңбекшіқазақ ауданынан қатысқан жас дарын Нұрислам Абдухамит жеңімпаз атанды. Ол аталған білім жарысында жаратылыстану-математикалық бағыт бойынша қатарластарынан озып шығып, ұстаздарының мерейін үстем етті.
№1 Рахат орта мектебінің оқушысы Нұрислам Абдухамит жайында бұдан бұрын да қалам тербеп, жас дарынның «Поэзияға ғашықпын» атты алғашқы жыр жинағының жарық көргендігін жұртқа жария еткен едік. Енді міне, оның тағы бір биік белесті бағындырған жетістігіне куә болып отырмыз. Сөйтсек, Нұрислам сөз өнері ғана емес, табиғаттың тылсым сырына бойлайтын жаратылыстану пәндерінен де алдына жан салмайтын жүйрік екен.
Ізденістен іркілмей зейін қойып, зердеге тоқымай білім бәйгесінде топ жару мүмкін емес-ті. Нұрислам да еліміздің әр өңірінен ең білімді шәкірттер жиналған білім додасына жету үшін аудандық, облыстық сыннан сүрінбей өтті.
– Кез келген олимпиаданың оңай болмасы анық. Сондықтан осы білім бәйгесінің әр кезеңіне тыңғылықты дайындалдым. Химия пәнінен сабақ беретін ұстазым Ерназар Нұртай маған күрделі есептердің сан алуан шешу жолдарын үйретті. Логикалық ойлау әдістерін меңгертті. Сөйтіп, химия пәніне деген қызығушылығымды арттырды. Бірақ осылай топ жарамын деп ойламадым. Астанада өзге облыстардан келген оқушылармен бірге сынға түскенде, өзімнің шынымен де жақсы дайындалғанымды аңғардым. Өзіме деген сенімім артып, алға ұмтылдым. Барлық сұрақтарға дұрыс жауап беріп, республикалық олимпиаданың абсолютті жеңімпазы атандым. Қазір ұстазыммен бірге тағы бір ғылыми жоба дайындап жатырмыз. Алда халықаралық олимпиадаларға қатысам деген ойдамын. Мұғалімім Ерназар ағайға, қолдау көрсеткен мектеп ұжымына зор алғыс айтамын, – дейді дарынды жас Нұрислам Абдухамит.
№1 Рахат орта мектебінің ұжымы оқушысының жетістігін білім ордасының даңқына балайды.
– Нұрислам Абдухамит – мектебіміздегі ең үздік оқушылардың бірі. Ол барлық пәнді жақсы оқиды. Мен оған асқақ арман, зор шығармашылық табыс тілеймін! Оның осы жолғы жетістігін ауданымыздың абыройы деп білемін. Біз дарынды шәкіртімізге қашанда қолдау көрсетеміз, – дейді мектеп директоры Бибігүл Жұмаханқызы.
Талапты шәкірт бұған дейін де аудан, облыс, республика көлемінде өткен шараларда сан мәрте жүлде алыпты. Сөз арасында жас дарын қолынан қаламын тастамай жыр жазып жүргендігін айтып қалды. «Жыр қанаты талмасын» деп іштей сүйініш білдірдік. Топтан озған Нұрисламның республикалық физика-математика мектебінің оқу гранты иегері атанғаны тағы бар. Жас шәкіртті жеңісімен құттықтап, жас ұрпақты жан-жақты дамытуға күш салған ұстаздарға да алғыс айтуды міндет деп білдік.
Ерзат Асыл,
Еңбекшіқазақ ауданы
