Бүгін елімізде Шаңырақ күні тойлануда. Мейрам қарсаңында Қонаев қалалық мәдениет бөлімінің басшысы Бибігүл Шайкенова отасқандарына 60 жыл толған Шыныбаевтар отбасымен тілдесіп, сый-сияпат табыстап қайтты.
Жақабай Шыныбаев пен Айтаңсық Тұрғамбаева бүгінде 2 ұлын ұяға, 3 қызын қияға қондырған. Балаларынан 14 немере, 21 шөбере сүйіп отыр.
Осы әулеттің отағасы Жақабай ата теміржол саласында қызмет етсе, жұбайы 36 жыл ұстаз болған. Айтаңсық апа «Халық ағарту ісінің озық қызметкері» атағымен марапатталып, зейнетке шыққан.
“Шаңырақ күнін тойлату дәстүрге айналса керек. Қоғамның іргесін қалаушы әр отбасы тату, қыздары қылықты, ұлдары мінезді, намысшыл болса, ел еңсесінің тік болғаны. Барша қазақстандықтарға бақыт тілейміз. Жас отбасылардың ажырасуы азайып, әр шаңырақ биік болсын! Кез келген жанұя үшін әр күн мереке болуы керек. Біздің отасқанымызға 60 жыл болды. Қызығы мен шыжығын қатар көріп келеміз. Осы күнімізге шүкір, тәубе дейміз”, – деді қос қария пікір білдіріп.
Бұдан кейін Арна ауылдық клубының директоры Анаргүл Серікқызы отау құрғандарына 40-50 жыл болған 4 отбасын мерекемен құттықтап шықты. Аталар ақ батасын беріп, әжелер алғысын жаудырды.
Қонаев қалалық әкімдігінің баспасөз қызметі
