Алматы облысының басшысы Марат Сұлтанғазиев апта соңына қарай Іле ауданындағы Боралдай кенті және Ащыбұлақ ауылдық округіндегі бірнеше ірі кәсіпорындарды аралады.
Ең алдымен Боралдай кентіндегі кәсіпкер, Н.Сыдықов басқаратын «Кормовик» жауапкершілігі шектеулі серіктестігіне келді. Онда электр жарығының жетіспеушілігі мәселесі сөз болды. Облыс басшысы алдағы уақытта жаңа электр торабы салынатынын жеткізді. «Кормовик» жауапкершілігі серіктестігінің негізгі қызметі – жануарлардың барлық түріне арналған премикстер мен концентраттар өндіру және құс және мал шаруашылығына арналған жемшөп ингредиенттерін сату. Онда жоғары сапаны қамтамасыз ету үшін серіктестіктің өз зертханасы бар және шикізат материалдары мен дайын өнім сапасын бақылаудың қатаң жүйесін құрылған 50 адамға жұмыс көзін ашып, 400 тоннаға жуық жемнің әралуан түрін өндіреді. Облыс басшысы кездесу соңында компания қызметкерлерімен бірігіп, жүздеген жас көшеттерді отырғызды. Айта кетейік, компания Қазақстан мен Бельгия мемлекеттері арасындағы екі жақты ынтымақтастық және экономикалық келісімшарт жасасып, меморандумға қол қойылғаннан кейін салынған.
Облыс әкімі осы Боралдай кентіндегі «FERRO CONSTRUCTION» ЖШС металл-конструкцияларын дайындау және монтаждау зауытына келді. Зауыттың директоры Владимир Баенбай зауыттың экономикалық жағдайымен кеңінен таныстырды. Зауыт металл-конструкцияларды дайындаумен және монтаждаумен айналысады. Заманауи құрылыс жабдықтарын қолданады. Компания дәнекерлеу, кесу, құрастыру, тегістеу сынды металл өңдеудің бірнеше түрін жүзеге асырады. Жылына 1800 тонна дайын өнім шығарады. Отыздан астам адамды жұмыспен қамтып отыр.
Облыс басшысы сонымен қатар «Таза Қазақстан» республикалық акциясы аясында Ащыбұлақ ауылдық округіндегі «Бірінші сыра зауыты» компаниясында ағаш отырғызу іс-шарасына да қатысты. «Бірінші сыра зауыты» 1958 жылы құрылған, республикадағы ең көне сыра қайнату зауыттарының бірі саналады. 57 мың тұрғыны бар Ащыбұлақ Іле ауданы бойынша халық тығыз орналасқан округ. Акцияға қос округ те атсалысып жатыр.
Бағдат Шойбас,
Іле ауданы
