Алматы облысының әкімдігі мен «Аспан ФМ» радиосы бірлесіп, 8 маусым күні Алматы облысының орталығы Қонаев қаласында облыс орталығының құрылғанына екі жыл толуына орай «ASPAN FEST» фестивалін өткізді.
Фестивальде Музарт, Әбдіжаппар Әлқожа, Серік Ибрагимов, Еркеш Хасен, «Үшқоңыр» фольклорлық-этнографиялық ансамблі және қазақ эстрадасының басқа да көптеген жарық жұлдыздары өнер көрсетті. Алаңға 12 мыңнан аса адам жиналды.
Сондай-ақ, шара аясында көпшілікке түрлі сыйлықтар ойнатылып, Алматы облысының қолөнер шеберлерінің жәрмеңкесі ұйымдастырылды.
Алматы облысының мәдениет, архивтер және құжаттама басқармасының басшысы Данияр Әлиев өз сұхбатында бұл фестивальдің тек бастамасы ғана екенін айтты. “Жаз бойы әр сенбі сайын қала тұрғындары мен қонақтарын дәл осы алаңда елімізге танымал әншілердің өнерін тамашалауға шақырамыз!” – деді ол.
