«Тарифті инвестицияға айырбастау» тұрғындар үшін әлеуметтік маңызы бар жоба. Өйткені, тариф — тұрмыстың сапасы мен әлеуметтік жағдайға әсер ететін басты фактор.
Бұл тіпті Мемлекет басшысының жолдауында да айқындалған. Сол себепті бүгін Өңірлік коммуникациялар қызметінде өткен баспасөз мәслихатында аймақтағы тарифті инвестицияға айырбастау тақырыбы көтерілді.
Аталмыш жоба Алматы облысында жүйелі жүзеге асып келеді. Оған ҚР Ұлттық экономика министрлігі Табиғи монополияларды реттеу комитетінің Алматы облысы бойынша департаменті мен облыстық энергетика және тұрғын үй-коммуналдық шаруашылық басқармасының бірлесіп 2022-2026 жылдарға арналған «Қонаев су арнасы» арнайы бағдарламасын бекітілгені дәлел болады.
Бағдарлама негізінде тартылатын инвестиция көлемі – 1,3 млрд. теңге. Табиғи монополияларды реттеу комитетінің Алматы облысы бойынша депатамент басшысы Барлық Төрехановтың сөзіне сүйенсек, бұл қаржыға алдағы таңда 42,6 км желіні жөндеуден өткізу көзделген, ақаулар қалпына келсе, тозған су желілерінің көлемі 80 пайыздан 67 пайызға дейін төмендейді деп күтілуде. Сонымен қатар, тарифті ұлғайту есебінен 168,4 млн.теңгеге «Талғар су» МКК үшін де инвестициялық бағдарлама әзірленді. Жоспар жүзеге асқан жағдайда, 16 км су желісі жөнделіп, желілердің тозу деңгейі 21 пайызға дейін азаяды деп жоспарлануда.
«Тарифті инвестицияға айырбастау» жобасына кіретін тағы бір бағыт – электр энергиясының тарифтері. Қазіргі кезде облыста электр тарату желілерінің ұзындығы 22,1 мың км құрайды, аталмыш желілердің 70%-ға жуығының тозығы жеткен. Облыстық энергетика және тұрғын-үй коммуналдық шаруашылық басшысының орынбасары Ракеш Байжұматовтың айтуынша, желілерді жөндеудің бірден-бір жолы тариф құнын өсіру. Сәйкесінше, өңірде «Тарифті инвестицияға айырбастау» жобасын іске асыру тиімді болмақ, осының негізінде Алматы облысында қытайлық TBEA компаниясымен мемлекеттік-жекешелік әріптестік арқылы жаңа 10 жоғары кернеулі қосалқы станция салынады. Жоба құны 100 млрд. теңгеден асады.
Бүгінде облыс әкімдігімен Қазақстан Республикасы Президентінің «тарифті инвестицияға айырбастау» бағдарламасын орындау мақсатында инвесторларды тарту ісі жалғасуда. Осылайша салынған инвестицияларды тариф есебінен қайтару үшін жұмыстар жүргізілуде.
