Іле ауданы Өтеген батыр ауылында тұратын №24 лицейдің 8-сынып оқушысы Ақжол Геройдың ерлігіне бүкіл ел сүйсінген еді. Мектеп оқушысының бағытынан айырылған автобусты тоқтатып, қаншама жанның өмірін сақтап қалғаны әлі есімізде. Жуырда Іле ауданынан тағы бір батыр бала шығып, есімі елге танылды. Боралдай кентіндегі №39 гимназияның 9-сынып оқушысы Ихсан Қамитбек отқа оранған үйден адамдарды аман алып шықты.
Оқиға 4 маусым күні болған. Ихсан Боралдай ауылындағы Найзашоқы көшесінде тұратын досының үйіне келе жатып, кенет сол көшедегі №11 үйдің отқа орана бастағанын көреді. Мектеп оқушысы өрт шыққан үйге ойланбастан жүгіріп кіріп, 63 жастағы қарт кісі мен 12 жастағы немересін сыртқа алып шығып, өрт сөндірушілерді шақырған. Сөйтіп, сын сағатта батырға тән мінез көрсетеді.
Мектептегі ұстаздарының айтуынша, Ихсан – әрдайым жасы кішілерге, қыздарға қамқор болып жүретін, мұғалімдерге құрмет пен ілтипат көрсететін тәрбиелі оқушы. Өз ісіне тиянақты, ақкөңіл, алғыр баланың жанкешті әрекетіне қалай қуанбайсың?! «Ерлік білекте емес, жүректе» дегендей, мұндай шешімге жүрегінде түгі бар адам ғана бара алатыны айтпаса да түсінікті. Ендеше осындай қайсар ұлды тәрбиелеп отырған ата-анасы мен ұстаздарына мың алғыс айтсақ артық болмас.
Бағдат Шойбас,
Іле ауданы
