Өрт қауіпті кезеңінде орман шаруашылығы мекемелерінде 7 өрт оқиғасы болды деп хабарлайды Өңірлік коммуникациялар қызметі.
Алматы облысы ТЖД мемлекеттік өрт бақылау басқармасының бастығы Самат Кенжеханның айтуынша, табиғи өрт ауа-райының қолайсыздығынан, дала алқаптарында азаматтардың қарапайым қауіпсіздік ережелерін сақтамауынан туындайды.
«Қазіргі таңда тілсіз жауды болдырмау мақсатында департамент қызметкелері арнайы рейдтер өткізуде. Азаматтық қорғау күштері, жергілікті полиция қызметі, орман мекемелері мен ЖАО-дан 81 адамнан тұратын 18 мобильдік топ құрылып, жұмыстар тұрақты жүргізілуде», – деді ТЖД өкілі Самат Кенжехан. Спикерлер өрт қауіпсіздігін жіті бақылау облыс көлеміндегі ауқымды жұмыстардың бірі екенін айта кетті.
Мәселен, «Amanat» партиясы Алматы облыстық филиалының саяси бөлімнің меңгерушісі Ержан Нұрпейісовтың айтуынша, 2023-2024 жылдарға арналған «Халықпен бірге!» сайлауалды бағдарламасында Алматы облысына 22 өрт сөндіру бекеттерінің құрылысы, халықты хабардар етуге 438 дыбысты сирена қондырғыларын сатып алу көзделген.
Сонымен қатар, департамент өкілінің айтуынша, орман алқаптары мен егіс алқаптарының айналасын күту бойынша жұмыстар жалғасып жатыр. Нәтижесінде, жергілікті атқарушы органдармен бірлесе отырып, 131 елдімекенге іргелес аумақтар қураған өсімдіктер мен жаңғыш қоқыстардан тазартылды.
