Жамбыл ауданындағы орталық кітапханада «Энергетиканы дамыту және ядролық кластер құру» тақырыбында дөңгелек үстел өтті. Шараға жергілікті әкімдік пен қоғам өкілдері, энергетика және экология саласының мамандары, оқытушылар мен студенттер қатысты.
Жиын энергетика саласын дамытудың келешегін, жаңартылатын энергия көздерінің тиімділігін және ядролық кластер құруды талқылау мақсатында ұйымдастырылды. Ерекше назар білім беру, білікті кадрлар даярлау, инновациялық технологияларды енгізу және өңірдің экономикалық мәселелеріне аударылды. Қазақстандағы энергетиканы дамытудың заманауи тенденциялары, саланың қазіргі жағдайы, перспективалық жобалар және жаһандық үрдістер туралы кеңінен сөз қозғалды. Инновациялық технологияларды енгізу және цифрландырудың өндіріске тигізетін әсері қарастырылды. Білікті кадрларды даярлау, білім беру бағдарламаларын жаңарту және практикалық жұмыстарды кеңейту қажеттілігі қозғалды. Энергетиканы заманауи дамыту – өңір үшін мүмкіндіктер мен артықшылықтарға жол ашып, жаңа жұмыс орындарын құруға, инвестиция тартуға оң әсер ететіні айтылды.
Ашық пікірталас форматында өткен шарада мамандар жаңа кадрлар даярлаудың қажеттілігі туралы ұсыныстарын ортаға салды. Жастар тақырыпқа қызығушылық танытып, белсенді түрде пікір алмасты. Тарих пәні оқытушысы Назерке Бекбосынова, Дегерес ауылдық округі жастар ісі жөніндегі әдіскер-нұсқаушы Е.Көшербай, физика пәні мұғалімдері Асқар Қызырхан, Айдын Құштар сияқты жас мамандар ой бөлісті.
Қатысушылар энергетиканы дамыту перспективалары туралы халықты белсенді түрде ақпараттандыру қажет деген қорытындыға келді. Ол үшін білім беру мекемелері мен өндірістік кәсіпорындар арасындағы өзара байланысты күшейту керек. Бұл орайда студенттер үшін кәсіби оқыту және тағылымдама бағдарламаларын дамыту маңызды.
Серік САТЫБАЛДИЕВ,
Жамбыл ауданы
