Ұлыстың ұлы күнінде Райымбек ауданы әкімдігінің ұсынысы бойынша, аудандық мәслихаттың шешімімен өңірдің әлеуметтік-экономикалық дамуына, жас ұрпаққа адамгершілік және патриоттық тәрбие беруге, әдебиет және журналистика саласында көркем туындылар жасауға, заңдылықты, құқықтық тәртіпті, қоғамдық қауіпсіздікті нығайтуға үлес қосқан Әлғожа Разықұлұлы мен Әбдіқадыр Жанбаев сияқты қарапайым еңбек ардагерлеріне және белгілі шығыстанушы ғалым, қарымды қаламгер Дүкен Мәсімханұлына «Райымбек ауданының Құрметті азаматы» атағы берілді.
Дүкен Мәсімханұлы 1963 жылы Қытай Халық Республикасында дүниеге келген. Пекиндегі Орталық ұлттар университетінің түлегі. Үрімжі қаласындағы ШҰАР гуманитарлық ғылымдар академиясының әдебиет институтында ғылыми қызметкер болып жұмыс істеді. 1993 жылы Әл-Фараби атындағы Қазақ ұлттық университетінің арнайы шақыруымен тарихи Отанына оралып, аталған оқу орнының шығыстану факультетінде ұстаздық етті.
Бұдан кейін Астана қаласындағы Л.Н.Гумилев атындағы Еуразия ұлттық университетінде Қытай филологиясы кафедрасын, Қытайтану ғылыми-зерттеу институтын басқарды. 2020 жылдан ҚРҒЖБ министрлігі Р.Сүлейменов атындағы Шығыстану институтының бас директоры қызметінде. «Қытай қазақтары поэзиясындағы ұлт-азаттық идея (ХХ ғасырдың 20-50 жылдары)», «Қазақ және қытай әдебиеттеріндегі ұлттық дәстүр мен жаңашылдық (М. Әуезов және Лу Шун шығармалары негізінде)» атты ғылыми еңбектердің авторы. Ғалымның ғылым және әдебиет саласындағы 40-тан астам кітабы жарық көрді.
Дүкен Мәсімханұлы ұлт жанашыры, қоғам қайраткері ретінде еліміздің қоғамдық-саяси өміріне де белсене араласып келеді. 2003-2019 жылдары ҚР Президенті жанындағы Ұлттық кеңестің мүшесі болды. 2019 жылдан республикалық «Отандастар қоры» жанындағы қандастар және көші-қон мәселелері жөніндегі республикалық қоғамдық комиссиясының, 2021 жылы ҚР Президенті Қ.Тоқаевтың Жарлығымен Қазақстан Халқы Ассамблеясының мүшесі болып тағайындалды.
Марапаттарыңыз құтты болсын!
Жұмабек ТҰРДИЕВ,
Райымбек ауданы
