Қонаев қалалық Мәдениет үйінде ақын, драматург, Халықаралық «Алаш» әдеби сыйлығының лауреаты, ТҮРКСОЙ арнайы сыйлығының иегері Бақыт Беделхан мен ақын, публицист, ұлттық журналистиканың жампозы, Қазақ радиосы Алматы бөлімшесінің жетекшісі Бақыт Жағыпарұлының шығармашылық кеші өтті.
Қос Бақыттың шығармашылық кеші облыс әкімінің орынбасары Ғани Майлыбаевтың құттықтау сөзімен ашылды.
– Әдебиет пен мәдениет кеңістігінде өзіндік қолтаңбасын қалыптастырған, оқырманын ойға жетелеп, жүрекке жол таба білген облыстың қос Бақыты – Бақыт Беделхан мен Бақыт Жағыпарұлын 50 жас мерейтойымен құттықтаймын. Бұл – шығармашылықтың кемел шағы, ой мен сөздің толысқан тұсы. Ағалар қаламынан туған туындылар облысымыздың рухани дамуына серпін беріп, ұлттық құндылықтарды дәріптеуге қызмет етіп келеді. Бүгінгі кітаптардың тұсаукесер рәсімі мен шығармашылық кеш – жеке мерейтой ғана емес, тұтас аймақтың мәдени өміріндегі маңызды оқиға. Бұл еңбектер – уақытпен үндескен, қоғамға ой салатын, жас ұрпаққа бағдар беретін рухани мұра, – деген Ғани Айдарұлы облыс басшылығы әрдайым руханият пен мәдениетке, қалам мен өнер иелеріне қолдау көрсетіп келе жатқанын және бұл бағыттағы игі істер алдағы уақытта да жалғасын таба беретінін тілге тиек етті. Сондай-ақ бүгінде 75 жасқа толып отырған көрнекті қаламгер Шаяхмет Құсайынұлын да мерейлі жасымен құттықтап, қазақ руханиятының дамуына қосып жатқан сүбелі үлесін атап өтті.
Келесі кезекте Ғани Айдарұлы, ақын, ҚР Мемлекеттік сыйлығының лауреаты, ТҮРКСОЙ Жазушылар одағының төрағасы Ұлықбек Есдәулет, Халықаралық «Алаш» әдеби сыйлығының лауреаттары Биғайша Медеуова мен Жарас Сәрсек, «Мұқағали» журналының бас редакторы Дүйсен Мағлұмов Бақыт Беделханның «Қаншеңгел» атты жаңа жыр жинағының, Бақыт Жағыпарұлының «Белес» және Шаяхмет Құсайынұлының «Керімағаш» кітаптарының тұсаукесер рәсімін жасады.
Мінберге шыққан Ұлықбек Оразбайұлы осындай әдеби-мәдени кештерге жұртшылықтың ықыласы оянып келе жатқанын атап өтіп, облыстың мәдениетін дамыту жайлы ойымен бөлісе келе, Мұқағали Мақатаевтың 95 жылдығына орай Қонаев қаласында әлемдік деңгейде поэзия кешін өткізу жөніндегі ұсынысын жеткізді. Сонымен бірге Бақыт Жағыпарұлы мен Бақыт Беделханға түркі дүниесіне ортақ руханиятқа сіңірген еңбегі үшін «Абай» халықаралық поэзия академиясының Абай атындағы алтын медалін табыстады.
Сахнада қос Бақыт тұсауы кесілген кітаптарына шолу жасап, өлең оқыды. Сонымен қатар ҚР Құрметті журналисі, Еңбекшіқазақ ауданының Құрметті азаматы Шаяхмет Құсайынұлы, ақын, Қонаев қаласы мен Абай облысы Ақсуат ауданының Құрметті азаматы Алтыншаш Жақиянова кеш иелеріне деген жылы лебіздерін арнады.
Кеш барысында Береке Мұрат, Өмірқұл Айниязов, Айбек Мұхамедәлі, Бибігүл Қилымхан сынды елімізге танымал әншілердің орындауында Бақыт Беделханның сөзіне жазылған «Бәйге», «Қайдасыңдар, жігіттер?», «Мен ешкім емеспін», «Дариға-ай, қайда барасың?!», «Қазағым-ай!» әндері шырқалды.
Айжарық КӨПТІЛЕУОВ
