Райымбек ауданы Жаңа Текес орта мектебінде жыл сайын ақиық ақын Мұқағали Мақатаевтың туған күніне орай поэзия кеші ұйымдастырылады. Осы бір айтулы сәтті асыға күтетін жас буын ақын аталарының өлеңдерін өрнектеп, шығармаларының шырайын кіргізеді. Дәстүрге айнала бастаған айтулы шара биыл да «Жүрегімде жыр болып қалған Мұқағали» атты тақырыпта жарасымды жалғасын тапты.
Мектепте өткізілетін Мұқағали оқуларына демеушілік танытып жүрген кәсіпкер Ардақ Нүсіпжанұлына ауыл тұрғындарының, ұстаздар мен шәкірттердің айтар алғысы шексіз. Бұл жолы да атымтай азамат Алматыдан ауылына асыға жетті. Ол Желтоқсан көтерілісіне қатысқан Серік Жиенбаев, Ермек Айтуаров, Ербол Қыдырбаев, Қабыл Малаевтармен бірге келді.
Бұрынғы жылдары мектепішілік деңгейде ғана аталып өтетін жыр кешінің осы жолы ауқымы кеңейгенін айтқан орынды. Биыл аталған шараға Текес, Тегістік, Қақпақ, Көксай, Қайнар, С.Сауранбаев және Талғар ауданы Жалқамыс орта мектебінен де оқушылар қатысты.
Әр кезең бойынша үміткерлердің қойылған талапты орындау шеберлігін қазылар алқасы қалт жібермей қадағалады. Сайыс қорытындысы бойынша Жаңа Текес орта мектебінің 8-сынып оқушысы Кәусар Қызайбай үздік деп танылып, бас жүлдені жеңіп алды. Жыр кешіне жоғары дайындықпен келген Қ.Шорманов орта мектебінің 11-сынып оқушысы Динара Тұрлығожа бірінші, аталған мектептің 6-сынып оқушысы Зере Шалқар екінші, Жаңа Текес орта мектебінің 9-сынып оқушысы Бану Миятбекқызы екінші, Талғар ауданы Жалғамыс орта мектебінің 9-сынып оқушысы Айару Тоқтархан үшінші, Жәмеңке орта мектебінің 7-сынып оқушысы Балнұр Александр үшінші орындарды иеленді.
Жеңімпаздар Райымбек аудандық білім бөлімінің Мақтау қағазымен марапатталды. Бас жүлдеге тағайындалған жыл бойы төленетін шәкіртақыны және 1-3 орындарға, ынталандыруға белгіленген ақшалай сыйлықтарды кештің демеушісі Ардақ Нүсіпжанұлы тапсырып, қатысушыларға бұдан кейінгі жарыстарда да зор жетістік тіледі. Сөйтіп, «Жүрегімде жыр болып қалған Мұқағали» атты жыр кеші өзіндік ерекшелігімен көпшілікті әсерге бөледі.
Жұмабек ТҰРДИЕВ
Райымбек ауданы
