«Адамдар арасындағы алшақтықты жойып, бір-біріне жақындастыратын – тіл. Тіл – қарым-қатынас құралы ғана емес, татулық тірегі» дейді Еңбекшіқазақ аудандық Ассамблея жастарының төрағасы Гузелнур Туйгунова. 1 мамыр – Қазақстан халықтарының бірлігі күніне орай Гузелнур Кудратқызымен сөйлесіп, жақын танысып қайттық.
Ол Ұйғыр ауданының Қалжат ауылында дүниеге келген. Әкесі – Кудрат пен бауыры – Руфат бүгінде жеке кәсіппен айналысады. Ал анасы Арзигуль – аспаз.
«Біздің ауылымызда негізінен қазақтар мен ұйғырлар тұрады. Кішкентайымыздан қазақ тілін ана тілімізбен бірге жетік меңгеріп өстік. Ауылдағы қазақтар ұйғырша, ұйғырлар қазақша бір-бірімен жақсы сөйлесіп, оңай тіл табысады. Жалпы, тіл – екі ұлт арасын жалғап жатқан татулық тірегі», – деген Гузелнурдың отбасында бәрі қазақ тілінде еркін сөйлейді.
Кейіпкерім болашақта бортсерік болуды армандап, кішкентайынан бірнеше тіл үйренуді мақсат еткен.
«Мектеп қабырғасында қазақ тілінің грамматикасына көп көңіл бөлдім. Мемлекеттік тілді ауызша ғана емес, жазбаша да жақсы меңгердім. Мектептен кейін Алматы қазақ-түрік гуманитарлық-технологиялық колледжіне аударма ісі бойынша оқуға түсіп, қазақ бөлімінде білім алдым. Ары қарай жоғары оқу орнында екі шет тілін оқыдым», – деген ол бүгінде қазақ, ұйғыр, орыс, түрік, ағылшын тілдерінде ойын еркін жеткізе алатын полиглот.
Гузелнур жоғары оқу орнын тәмамдаған соң бала күнгі арманы бортсерік болуды емес, мұғалімдікті таңдайды. Еңбекшіқазақ ауданы Жаңашар ауылында Т.Рысқұлов атындағы орта мектепке ағылшын тілі пәнінің мұғалімі болып орналасады.
«Ұстаздық жаныма жақын. Балаларға сапалы білім мен саналы тәрбие беру, бар білгенімді үйрету – негізгі мақсатым. Мектептегі оқушыларға ағылшын тілінен сабақ берсем, қосымша балабақшадағы бүлдіршіндерге ағылшынмен бірге қазақ тілін де үйретемін. Осы елдің азаматы болғандықтан мемлекеттік тілді білу, оның қолдану аясын кеңейтіп, мәртебесін биіктетуге атсалысу – әрқайсымыздың ел алдындағы борышымыз деп білемін. Ауқымды іс тындырмасам да, ауданымызда, облыста ұйымдастырылатын қоғамдық-мәдени іс-шаралардың басы-қасында жүріп, осындай шағын қадамдармен мемлекеттік тілдің тұғырын биіктетуге өз үлесімді қосып жатырмын деп ойлаймын», – дейді.
«2023 жылы Қонаев қаласында жастардың «Бірлік» лагері ұйымдастырылды. Бұл лагерь жастар арасында достық қарым-қатынасты нығайту, қазақстандық патриотизм мен жалпыұлттық бірлікті дәріптеу, сондай-ақ мемлекеттік жастар саясатын іске асыруды мақсат ететінін білген соң арнайы іздеп бардым. Өңірлерден келген көптеген жастармен жүздесіп, өзара тәжірибе алмасып, керемет көңіл-күймен шабыттанып келдім. Осы шабытпен Еңбекшіқазақ аудандық Ассамблея жастарының төрағасы болдым. Бұл – өте қызықты әрі өте жауапты жұмыс. Қоғамдық келісім және даму орталығымен, аудан жастарымен, ауыл-ауылдардағы ақсақалдар, аналар кеңестерімен жиі мәдени іс-шаралар өткізіп тұрамыз. «Кемедегінің жаны бір» демекші, бір елде, бір шаңырақ астында өмір сүріп жатқандықтан бәріміздің мақсат-мүддеміз ортақ. Біз бір бағытқа бірлесе бет алғанда ғана асқақ армандарымызға қол жеткізе аламыз. Ал осы орайда бізді біріктіретін үлкен күш – мемлекеттік тіл екені сөзсіз. Ассамблея жастары бір-бірімізбен қазақша сөйлесеміз, ақпарат алмасамыз. Мемлекеттік тілді меңгергеніміз бізді бір арнаға тоғыстырып тұр. Қазақ тілін жетік білетінімнің арқасында көптеген мүмкіндікке ие болдым», – деген Гузелнур ауданда, облыста ұйымдастырылған көптеген тіл байқауларының жеңімпазы. Былтыр қазақтың ұлы ақыны Абай Құнанбаевтың 180 жылдығына орай облыстық тілдерді дамыту жөніндегі басқарманың облыстық байқауында бас жүлдені жеңіп алды.
Мемлекеттік тілдің маңызын ескеріп, оны мүмкіндік ретінде қарастырған, қазақ тілін меңгере отырып, тілдің тұғырын биіктетуге қолынан келгенше үлесін қосып жүрген Гузелнур өзін «Үлкен елдің кішкентай патриотымын. Тілге құрметім – елге құрметім» дейді.
Құралай МҰРАТҚЫЗЫ
Еңбекшіқазақ ауданы
