Іле ауданына қарасты Таңбалытас аумағында Ұжымдық қауіпсіздік шарты ұйымдарының (ҰҚШҰ) құтқару бөлімшелері «Жартас – 2024» бірлескен тактикалық арнайы оқу-жаттығуын өткізді. Шараға ҰҚШҰ-ға мүше мемлекеттердің төтенше жағдай өкілдері қатысты. Атап айтқанда, халықаралық оқу-жаттығуға Қазақстаннан бөлек, Беларусь, Қырғызстан, Тәжікстан және Ресей Федерациясының төтенше жағдай қызметкерлері шақырылды.
Оқу-жаттығудың бірінші күні командалық-штабтық ойын форматында қауіп төнген және орын алған жағдайда әрекет ету үшін жедел штабтың жұмысын қалай ұйымдастыру жайы пысықталды. Жер сілкінісі кезінде ҰҚШҰ-ға мүше мемлекеттердің құтқарушылары мен техника құралдары таныстырылды. Жаттығудың практикалық бөлімінде апаттық-құтқару жұмыстары жүргізілген аймақтардағы жағдай нақтыланды. Жоғары оқу орындарының көмегімен төтенше жағдайға байланысты тәжірибелік сабақтар оқытылды.
Жаттығу аясында белгілі бір елдімекенде күшті жер сілкінісі болады. Салдарынан өндірістік ғимараттар мен көпірлер қирап, химиялық және радиоактивті заттар ағып, өрт шығып, адам шығыны тіркеледі. Құтқарушылар ұшақ, парашюттік-құтқару жасақтары мен кинологтар көмегімен аймаққа барлау жұмыстарын жүргізіп, зардап шеккендерді құтқарады. Сонымен қатар, өрт сөндіру, пойызбен құтқару, алғашқы медициналық көмек көрсету және далалық лагерь құру жұмыстары пысықталды. Оқу-жаттығуға өрт сөндірушілер, құтқару бөлімшелері, авиация, дрондар мен робототехника тартылды. Нәтижесінде, ҰҚШҰ-ға мүше мемлекеттердің төтенше жағдай қызметкерлері практикалық дағдыларын жетілдірді. Оқу-жаттығу барысында ҰҚШҰ-ға мүше мемлекеттердің құтқарушылары өзара тәжірибе алмасып қана қоймай, бірігу арқылы көптеген төтенше жағдайды тез арада жеңуге болатынын түсінді.
– Біздің ел жазықта орналасқан. Тауда жаттығып, дайындықтан өтуге мүмкіндігіміз жоқ. Қуаныштысы, Қазақстанға, Алматы облысына келіп, таулы жерде біліктілігімізді шыңдап үйрендік. Біздің бөлімше – «Зубр» арнайы жасақ отряды осындай іс-шаралардың арқасында мол тәжірибе жинақтады. Біз кез келген жағдайда жұмыс істеуге дайын болуымыз керек, – деп атап өтті Беларусь Республикасы Төтенше жағдайлар министрлігі «Зубр» республикалық арнайы жасағы бастығының бірінші орынбасары Андрей Метельский. Халықаралық шараның қорытындысына ҰҚШҰ Бас хатшысы Иманғали Тасмағамбетов бастаған жауапты сала өкілдері, Үкімет пен министрліктің қызметкерлері, Беларусь Республикасының Төтенше жағдайлар министрі Вадим Синявский, Алматы облысының әкімі Марат Сұлтанғазиев келді.
– Оқу-жаттығу біздің министрліктер мен ведомстволардың төтенше жағдайлар кезіндегі өзара іс-қимылын жақсартуға бағытталған. Жаттығуда жоғары кәсібилік бағыты сәтті көрсетілді. Жаттығудың барлық мақсаты орындалды. Ұйымдастырған ҚР Төтенше жағдайлар министрлігіне ерекше алғыс айтқым келеді. Барлық қатысушыларға ризашылығым шексіз. Жаттығудың сәтті аяқталуымен баршаңызды құттықтаймын! Сіздерге зор денсаулық, мол табыс тілеймін, – деді салтанатты жиында ҰҚШҰ Бас хатшысы Иманғали Тасмағамбетов.
«Жартас – 2024» арнайы оқу-жаттығуы аясында ҰҚШҰ-ға мүше мемлекеттердің құтқару бөлімшелері арасында көпсайыс бойынша жарыстар өтті. Жарыс қорытындысында Қазақстан құрамасы бірінші орын, Беларусь командасы екінші орын, Қырғызстан құрамасы үшінші орын алды. «Достық кубогы» Ресей мен Тәжікстан құрамаларына берілді. Бірлескен шарадан кейін Ұжымдық қауіпсіздік шарты ұйымына мүше мемлекеттердің Төтенше жағдайлар жөніндегі үйлестіру кеңесінің отырысы ұйымдастырылды.
Жандос ҚҰРБАНОВ
Іле ауданы
