Шелек тарихи-өлкетану музейінде өткеннен сыр шертетін жәдігерлер аз емес. Соның бірі – Кеңес одағының Батыры Төле Кенжебаев пайдаланған үстел сағаты. Оған қараған сайын, сұрапыл жылдардағы атамыздың ерлік жолы еске түседі.
Төле Таскентбайұлы 1902 жылы қазіргі Еңбекшіқазақ ауданы Шелек ауылында дүниеге келген. 1942 жылы Екінші дүниежүзілік соғысқа аттанып, 60-гвардиялық атты әскер полкі 1-эскадронының (Орталық майдан, 61-армия, 7-гвардиялық атты әскер корпусы, 16-гвардиялық атты әскер дивизиясы) жауынгері атанды. Төле Кенжебаев 1943 жылы 27 қыркүйекте Нивки деревнясы маңындағы Днепр өзенінен алғашқылардың бірі болып өткен. Борап тұрған оқтың астында қалтқысы бар екі салды Кеңес әскері тұрған жағалауға жеткізіп, жауынгерлердің арғы бетке өтуін қамтамасыз етеді. Ол жаудың қарсы шабуылын тойтаруға қатысып, 3 жауынгерін жер жастандырып, бір офицерін тұтқынға алған. Төле атамыз сияқты ержүрек ерлердің арқасында Кеңес әскері Днепрдегі ұрыста жеңіске жетті. Сол үшін Төле Кенжебаевқа Кеңес одағының Батыры атағы берілді.
Соғыстан кейін аман-есен туған жеріне оралып, «Авангард» ұжымшарының жылқы фермасында еңбек етті. 1988 жылы 86 жасында қайтыс болды. Музейдегі үстел сағатын Батыр атамыз «Авангард» ұжымшарында тұрғанда пайдаланған екен. Биыл сол жәдігерді ұлы Дәулет Кенжебаев музейге табыс етті.
Қуанәлі АЛМАСБЕКҰЛЫ,
Шелек тарихи-өлкетану музейінің қор сақтаушысы
