Бердібек Соқпақбаевтың 100 жылдық мерейтойына орай Кеген аудандық ішкі саясат бөлімі мен «YERKIN» жастар қоғамдық бірлестігі «Бердібек әлеміне саяхат» атты оқушылар арасында байқау өткізді. Онда балалар қаламгердің өмірі мен шығармашылығы бойынша эссе, өлең жазып бақ сынасты.
Байқауға жетпіске жуық өтінім келіп түскен. Қазылар алқасы үміткердің эссе жазудағы шеберлігі, ойының тереңдігі, тақырыпқа сәйкестігі және тағы басқа қырларына баса назар аударды.
Аталған шарада ең алдымен көпшілікке кітап көрмесі таныстырылып, жазушы туралы бейнефильм көрсетілді. Алғашқы құттықтау сөзін алған Кеген ауданы әкімінің орынбасары Кеңес Қабылбеков:
– Қасиетті қазақ даласында ұлт әдебиетін әлемдік деңгейге көтерген қаламгер Бердібек Соқпақбаевтың шығармашылығын жас ұрпаққа насихаттау мақсатында өткен оқушылар арасындағы байқаудың қорытынды жиынында бас қосып отырмыз. Биыл Алматы облысының әкімі Марат Сұлтанғазиевтің қолдауымен елдімекендердегі көше, мектептерге және саябақтарға жазушының есімі берілді. Қаламгер туралы спектакльдер қойылып, кітаптары жарық көрді,– дей келе, шығармашылық жарыстан оза шапқан оқушыларға арнайы дипломдар мен ақшалай сыйлықтарды табыс етті. Ардагер-журналист Шыңғыс Тұрсынов, ақын Шеризат Мекебаев жас ұрпаққа ізгі тілегін арнады.
Байқаудың бас жүлдесін Шырғанақ ауылынан келген Еңлік Оразақын иеленді. Тасашылық Бахарбек Дәулетжан жүлделі I орын иегері атанса, ІІ орын Жалағаш мектебінің оқушысы Талшын Бейсенбайға бұйырды. Қарабұлақ ауылынан келген Әсия Айтберген үшінші орыннан көрінді. Ынталандыру сыйлығы Айзат Бақберген, Нұрай Кенжебек, Алина Тілек, Сәкен Аяна, Ақарыс Нұрбақыттарға табысталды.
Шара соңы аудандық көркемөнерпаздар дайындаған концерттік бағдарламаға ұласты.
Дәурен ӘБУТӘЛІПОВ
Кеген ауданы
