Бүгін қазақ әдебиетіне өзгеше өрнек, ғажайып сыр-сипат әкелген жазушы Бердібек Соқпақбаевтың 100 жылдығы Париж қаласында, ЮНЕСКО-ның штаб пәтерінде аталып өтті.
Тарихқа көз жүгіртсек, Қазақстан 1992 жылы ЮНЕСКО мүшесі болды. Сол кезеңнен бастап түрлі салаға қатысты шаралар халықаралық деңгейде қолдау тауып келеді.
Сондай ауқымды шаралардың бірі 100 жылдық мерейтойға арналған конференцияны Елші, ҚР-ның ЮНЕСКО жанындағы Тұрақты өкілі Асқар Абдрахманов жүргізді. Алқалы жиынға ҚР МАМ комитетінің төрағасы Рустам Әли қатысып, көпшілікке ҚР Мəдениет жəне ақпарат министрі Аида Балаеваның құттықтауын жеткізді. Ал Алматы облысының әкімі Марат Сұлтанғазиевтың құттықтауын облыстық маслихат төрағасы Қуат Байғоджаев жеткізді. Сондай-ақ отырысқа бірқатар зиялы қауым өкілдері қатысты.
Бұған қоса шара барысында «Менің атым Қожа» кітабының француз тіліндегі нұсқасының тұсаукесері өтті. Осы орайда Қазақстан Жазушылар одағының төрағасы Мереке Құлкенов, жазушы-публицист Марат Тоқашбаев, филология ғылымының докторы Кенжехан Матыжанов және ҚР Парламенті Мəжілісінің депутаты Жанарбек Əшімжан сөз алып, Б. Соқпақбаев шығармашылығының ерекшелігі, сондай-ақ Азия және Еуропа елдерінің әдеби байланысының маңызына тоқталды. Оған қоса асылдың тұяғы Самал Соқпақбаева әкесі жайлы естеліктерін бөлісіп, ұйымдастырушыларға алғысын білдірді.
Шара барысында Мәдениет жөніндегі ЮНЕСКО Бас директорының орынбасары Эрнесто Оттоне Бердібек Соқпақбаевтың шығармашылығын жоғары бағалап, өз ойларын ортаға салды.
Сонымен қатар, Қазақстанның халық әртісі, күйші-сазгер Секен Тұрысбек және «Үшқоңыр» фольклорлық ансамблі көпшілікке қазақ өнерін паш етті.
