Облысымыздағы барлық нысан мен тұрғын үйлердің жылу, жарықпен қамтылуына күш салып жүрген азаматтар кәсіби мереке қарсаңында марапатталды. Энергетиктер күніне орай өткен салтанатты шарада облыс әкімі Марат Сұлтанғазиев сала мамандарын құттықтап, мемлекеттік наградаларды табыс етті.
– Энергетика – экономиканың тірегі, дамудың қозғаушы күші, күнделікті өміріміздің ажырамас бөлігі. Мемлекет басшысы Қасым-Жомарт Тоқаев: «Энергетикалық қауіпсіздікті қамтамасыз ету – басты міндеттің бірі. Қазақстанда энергияны тұтыну қарқыны жылдан жылға артып келеді. Бірақ іске қосылып жатқан жаңа қуат көздері оған сай емес. Сұраныстан артық өндірілген электр қуаты таяу арада сарқылуы мүмкін. Шын мәнінде, еліміздің дамуы энергетика саласының тұрақтылығына тікелей байланысты», – деген еді.
Облыс экономикасын қарқынды дамыту үшін де энергетика маңызды. Облыс орталығы Қонаев қаласының тарихы да осы энергетика саласымен тығыз байланысты. Бүгінде өңірдегі электр қуатын арттыруға бағытталған ауқымды жобалар қолға алынуда. Бұл қадам аймақтың жан-жақты өркендеуіне оң әсерін тигізеді. Сіздер осы жолда аянбай тер төгіп, қоғамға қызмет етудің нағыз үлгісін көрсетіп келесіздер. Қиын да жауапты салада атқарып жатқан еңбектеріңіз ерекше құрметке лайық. Әсіресе, ауа райының қолайсыздығына, тәуліктің кез келген мезгіліне қарамастан, халық игілігі үшін еңбек етіп жүргендеріңіз үшін ризашылығымыз шексіз, – деді Марат Елеусізұлы өз сөзінде.
Салтанатты рәсім барысында ҚР Мемлекет басшысының Жарлығымен жерлестеріміз Шамиль Гумаров, Руслан Бейсенбаев «Құрмет» орденімен марапатталса, Асхат Джамаров, Айтмұханбет Мырзағалиев, Ержан Шаймерденов сынды сала үздіктеріне «Ерен еңбегі үшін» медалі берілді. Энергетика саласында елеулі еңбек етіп келе жатқан бірқатар маманға ҚР Энергетика министрі Алмасадам Сәтқалиевтің «Электр энергетикасы саласына қосқан үлесі үшін» медалі, «Құрметті энергетик» төсбелгісі, «Құрмет» грамотасы мен Алғыс хаты табыс етілді. Өңір тұғындарын жылу және жарықпен қамтамасыз етуде қалтқысыз еңбек еткен қызметкерлер облыс әкімінің Құрмет грамотасы мен Алғыс хатына ие болды.
Энергетика саласында атқарылған істерді айта кетер болсақ, кейінгі 6 жылда облыста қуаты 300 мегаваттан асатын 15 жаңартылған энергия көзі салынған. Алдағы екі жылда қуаты 130 мегаватт 18 жоба іске асырылмақ. Энергетика саласы – инвестиция үшін перспективалы саналады. Осы бағытта да ауқымды істер атқарылуда.
Ерзат АСЫЛ
