Дәрігердің біліктілігі, медициналық мекеменің талапқа сай болуы халық денсаулығының жақсаруына әсер етеді. Сондықтан бұл салаға мемлекет ерекше көңіл бөлуде. Осыған орай Кеген өңірінде қандай жұмыстар атқарылып жатыр деген сұрақтарға аудандық аурухана директоры Алмас Тілеулиев кеңінен жауап қайтарды.
Бас дәрігердің айтуынша, бүгінгі таңда ауданда 60 дәрігер, 245 орта және 73 кіші медицина маманы жұмыс істейді. Онколог, акушер-гинеколог, хирург, дерматолог және үш жалпы тәжірибелік дәрігер қажеттігі туындап отыр. Өңір бойынша тұрғындарға 31 емдеу мекемесі қызмет көрсетуде. 1 аудандық аурухана, 7 дәрігерлік амбулатория, 6 фельдшерлік-акушерлік және 17 медициналық пункт бар. Бүгінде Ұзынбұлақ дәрігерлік амбулаториясын, Ақтасты медициналық пунктін күрделі жөндеуден өткізу үшін жобалық-сметалық құжаттар дайындалып, сараптамаға жіберілді. «Ауылда денсаулық саласын жаңғырту» бағдарламасы аясында Күрметідегі амбулатория ғимаратының құрылысы басталды.
– Аудандық аурухана жанында емхана бөлімі орналасқан. Онда арнайы геронтология кабинеті жабдықталған. Қарттарға, мүмкіндігі шектеулі жандарға сонда арнайы мамандар қызмет көрсетеді. Емхана бөлімінде отбасын жоспарлау, дені сау бала, қарттар, қант диабеті, артериалды гипертензия, босануға дайындық, жас аналар, мінез-құлық факторлары және созылмалы жүрек жетіспеушілік мектептері бар. Диспансерлік есепте 3514 науқас тіркелген, – дейді Алмас Тілеулиев.
Аудан халқын тегін дәрі-дәрмекпен қамтамасыз ету үшін өткен жылдың тоғыз айында 110 млн 511 мың 187 теңгеге дәрі сатып алынған. Шалғай елдімекендердегі тұрғындар басы ауырып, балтыры сыздаған жағдайда аудан орталығына көп келе бермейтіні анық. Сондықтан аурудың алдын алуда жылжымалы медициналық көліктер қарастырылған. Солардың көмегімен 6125 тұрғынды тексеруден өткізу жоспарланып отыр.
Аудан бойынша тәуліктік стационарда 2380 науқас жоспарлы және шұғыл түрде ем алып шықты. Сонымен қатар ауруханада перзентхана, хирургия, жансақтау, қабылдау-диагностикалық, жұқпалы аурулар бөлімдері бар. 226 науқасқа ота жасалды. Жалағаш дәрігерлік амбулаториясы ғимаратынан ересектерге арналған 34 орынды оңалту және курортология бөлімі ашылды. Науқастар әлеуметтік қызметтер порталы және жоспарлы жатқызу арқылы ем қабылдайды.
Дәурен ӘБУТӘЛІПОВ
Кеген ауданы
