Биыл Қонаев қаласындағы бірқатар саяжайға шағынаудан мәртебесі беріледі. Былтыр «Строительная» саяжайы шағынауданға айналып, атауы «Құрылысшы» болып өзгертілді. Мұнда бірқатар жұмыс атқарылған.
Атап айтқанда, шағынауданның электр желілері толығымен «Алатау Жарық Компаниясы» АҚ иелігіне өтті. Нәтижесінде халық табиғи монополияларды реттеу департаментімен бекітілген тариф бойынша электр энергиясына ақы төлеп отыр. Сондай-ақ бұл шағынауданға ауызсу және кәріз суы құбырларын тарту үшін жобалық-сметалық құжаттар әзірленуде. «Халық қатысатын бюджет» жобасы бойынша көшені жарықтандыру бағаналары ауыстырылып, футбол алаңы салынуда. Бұл өз кезегінде ыңғайлы орта қалыптастырып, балалар мен жасөспірімдердің уақытын тиімді пайдалануға септігін тигізеді.
Қонаев қаласының әкімі Асхат Бердіхановтың айтуынша, биыл бірнеше саяжайға шағынаудан мәртебесін беру жоспарланған. Бүгінгі таңда «Құрылысшы» шағынауданының тәжірибесіне сүйене отырып, 7-ші саяжайдағы трансформаторлар мен электр желілерін ТҮКШ бөліміне өткізу процесі жүріп жатыр. Бұл іс-шаралардан соң желілер «Алатау Жарық Компаниясы» АҚ-ға сенімгерлік басқаруға беріледі. Аталған компания күтіп-ұстауға жауапты болады. Нәтижесінде жарықтың жиі өшуі мәселесі шешіледі деп күтілуде. Бұдан бөлек, Қонаев қаласының кешенді даму жоспарына сәйкес, барлық саяжайды газдандыру үшін жобалық-сметалық құжаты дайындалып жатыр.
Асхат Бердіханов Бас жоспарға қатысты атқарылып жатқан жұмыстармен де бөлісті. «Қала аумағында 7 саяжай қалды. Қазіргі таңда сәулет және қала құрылысы бөлімі кооперативтердің басшыларымен бірлесе отырып, жерді, ғимараттарды, инженерлік желілер мен көлік инфрақұрылымын түгендеу жұмысы жүргізілуде. Бас жоспарға саяжайлар бойынша түзетулер енгізілді. Енді оны Үкімет бекітуі тиіс. Бұл құжатқа сәйкес, қазіргі саяжайлар аумағында әкімшілік, әлеуметтік нысандарды, кәсіпкерлік ғимараттарын, көпқабатты тұрғын үйлер салу көзделген», – деді әкім.
Саяжайлардағы инфрақұрылымды дамыту бағытындағы жұмыстар бірнеше жыл бойы жүргізіліп, түйткілдердің түйіні кезең-кезеңімен тарқатылады деп жоспарланған.
Ақерке Жұмағазықызы
Қонаев қаласы
