Халықаралық әйелдер күніне орай облыс әкімі Марат Сұлтанғазиев, Қонаев қаласы әкімінің орынбасары Сәуле Нұрсұлтанова Қонаев қалалық аналар кеңесінің төрағасы Дәметкен Нүсіпбекованың шаңырағына арнайы барып, мерекемен құттықтады. Меймандарын жарқын жүзбен қарсы алып, төрге оздырған ардагер-ұстаз өзін елеп-ескеріп, мерекемен құттықтап келіп жатқан аймақ басшысы мен басқа да қонақтарға жүрекжарды алғысын білдіріп, ақ батасын берді.
Марат Елеусізұлы Дәметкен апайдың зейнеткер болса да, аналардың басын қосып, қоғамдық жұмыстарға белсене атсалысып жүргеніне ризашылығын білдірді. Сонымен бірге Дінмұхамед Қонаевтың есімін еншілеп, облыс орталығы мәртебесін иеленген қаланың Бас жоспары мен кешенді даму жоспары аясында атқарылатын ауқымды жұмыс жайынан хабардар етті.
Дәметкен Таласбекқызы Қонаев қаласының тұрғыны болғанына жарты ғасырдан асқанын, өзінің осы шаһарда тұңғыш қазақ мектебінің ашылуына ұйытқы болғанын тілге тиек етті.
– Ол кезде қала тұрғындарының 20 пайыздайы ғана қазақ ұлтының өкілдері болатын. Оның ішінде ана тілін еркін меңгергендері де көп емес еді. Өткен ғасырдың 80-жылдарының ортасынан бастап ұлттық мүддені жоғары қойған азаматтар ынталы топ құрып, қалада қазақ мектебін ашу жайлы бастама көтергенбіз. Еңбегіміз зая кетпей, 1990 жылы 30 шілдеде халық депутаттары Қапшағай қалалық кеңесі атқару комитеті «Қазақ мектебінің ашылуы туралы» шешім қабылдады. Қонаев қаласындағы алғашқы қазақ мектебі №2 орыс мектебінің бұрынғы шеберханасында орналасты. Онда небәрі 8 сынып бөлмесі болды. Кеңес одағы тарағаннан кейін орыстардың көпшілігі қоныс аударып, орыс мектептеріндегі оқушылар саны азая бастады. 1999 жылы №3 мектептегі оқушылар №4 орта білім шаңырағына түгелдей көшіріліп, №3 оқу ошағы таза қазақ мектебі болды. Оған дейін әлгі 8 бөлмеге сыймаған қазақ сыныптары өзге мектептер мен балабақшаларда бөлініп оқып жүрген еді, – деп сол бір кезді еске алды Қонаевта ашылған тұңғыш қазақ мектебінің алғашқы директоры болған Дәметкен Нүсіпбекова. Сондай-ақ орыс мектебінің нұсқасын негізге ала отырып, жан-жақтан жиналған, білім деңгейі әртүрлі қазақ балаларына білім беру оңайға соқпағанын, қалада қазақ мектебінің ашылғанына қуанған намысты азамат, сол кездегі «ТяжСтрой» мекемесінің басшысы болған Мұхтар Айсауытовтың демеушілік көмегін аямағанын айтты. Қалалық аналар кеңесінің төрағасы ретінде атқарып жатқан жұмыстар жайын да баппен баяндады. Бүгінде немерелерінің қызығын көріп отырған Дәметкен апай өзін құттықтап келген қонақтарға риясыз алғысын жаудырып, жылы қоштасты.
Күнжарық БАҚТЫБАЙҰЛЫ
Қонаев қаласы
