Өзбекстан астанасы Ташкенттегі Низами атындағы мемлекеттік педагогикалық университетінде облыстық мәдениет, архивтер және құжаттама басқармасының бөлім басшысы, ақын, ҚР Мәдениет қайраткері, Қазақстан Жазушылар одағының мүшесі Төлеужан Ғұмаровтың «Алтын бесік» кітабының таныстырылымы өтті.
Шараға аталмыш жоғары оқу орнының профессор-оқытушылары, қос ел қаламгерлері, атап айтар болсақ, Лала Жүнісқызы, Наргиза Асадова, Өзбекстан Жазушылар одағындағы қазақ әдебиеті кеңесінің төрағасы Тұрсынәлі Ахметов және студент жастар қатысты. Кездесуді Низами атындағы мемлекеттік педагогикалық университетінің қазақ тілі және әдебиеті кафедрасының меңгерушісі, педагогика ғылымдарының докторы, профессор, Өзбекстан Жазушылар одағының мүшесі Ергеш Абдувалитов жүргізді. «Алтын бесік» кітабының ұлттық құндылығы, екі ел арасындағы мәдени қарым-қатынастың рухани маңызы жөнінде Тұрсынәлі Ахметов баяндама жасады.
Төлеужан Нүсіпжанұлының кітабын Халықаралық «Миртемир» сыйлығының лауреаты Робия Қамшыбекқызы өзбек тіліне аударған. Сондықтан әдеби кездесуде қазақ-өзбек достығы, Т.Ғұмаров пен Р.Дустанованың шығармашылығы жайлы сөз өрбіді. Қазақ тілі және әдебиеті бөлімінің студенттері қос ақынның өлеңдерін жатқа оқып, жиналған көпшілікті сүйіндірді. Шара соңында студенттер қаламгерлердің өмірі мен шығармашылығы жайлы кеңінен танысып, өздерін қызықтырған сұрақтарға жауап алды және авторлар өз қолтаңбасымен оқырмандарына кітаптарын сыйға берді.
Биыл облыс әкімдігінің қолдауымен жарық көрген «Алтын бесік» кітабының алғашқы тұсаукесері Қонаев қаласында өткен. Бұл кітапта қазақтың салт-дәстүрлері мен тыйым сөздері, ұлттық ойындары мен тұрмыстық заттарының атаулары өлең болып енгізілген. Бастауыш сынып оқушылары мен балабақша тәрбиешілеріне оқу-әдістемелік құралы ретінде пайдалануға болады.
Ерзат АСЫЛ
Ташкент қаласы,
Өзбекстан Республикасы
