Қазақстан Бас прокурорының орынбасары Жандос Өмірәлиев Абай облысындағы орман өртінің шығуы себебі бойынша бірнеше нұсқа қарастырылып жатқанын айтты. Бұл туралы ҚазАқпарат хабарлады.
«Бірінші нұсқа — орманды қасақана өртеу. Яғни ағашты сату мақсатында осындай қылмыс жасалуы мүмкін. Екіншіден, өрттің адами фактор салдарынан таралып кетуі. Ал үшінші нұсқа — өртке табиғи фактор себеп болуы мүмкін. Үш нұсқаның барлығы тексеріледі», – деді Жандос Өмірәлиев бүгін Мәжіліс отырысынан кейін тілшілер сұрағына жауап бере отырып.
Бұған дейін Жандос Өмірәлиев Абай облысындағы өртке қатысты қылмыстық іс аясында министрлер мен әкімдерден жауап алу туралы сұраққа жауабында өз қызметіне салғырт қараған лауазым иелері қылмыстық жазаға тартылатынын айтқан.
Бас прокуратура 11 маусымда өрт қатысты Қылмыстық кодекстің 292-бабының 3-бөлігі (абайсызда екі және одан да көп адамның өліміне әкеп соққан өрт қауіпсіздігі талаптарын бұзу) бойынша сотқа дейінгі тергеу амалдарын бастаған.
Сонымен қатар, адамдардың қаза болуына және қоршаған ортаға елеулі зиян келтіруге әкеп соққан ауыр зардаптарды назарға ала отырып, арнайы прокурор салғырттық фактісі бойынша қылмыстық іс қозғаған.
