Республикалық «Таза Қазақстан» экологиялық акциясы аясында облыс аумағында кезекті сенбілік ұйымдастырылды. Шараға облыстың барлық аудан-қаласынан 30 мыңға жуық тұрғын белсене қатысып, 108 тонна қоқыс пен тұрмыстық қалдық жиналды.
Сенбілікте тазалық жұмыстары 95 гектар аумақта жүргізілді. Акцияға қатысқандардың негізгі бөлігін мемлекеттік орган қызметкерлері мен еріктілер құрады. Аула, көше, далалы аймақтарды тазарту жұмыстарына 30-ға жуық арнайы техника тартылды. Жиналған қоқыс тиісті полигондарға жіберілді.
Аталған акция тұрғындардың ауызбіршілігі мен сыйластығын ғана көрсетіп қоймай, табиғатқа, қоршаған ортаға деген жанашырлығын да байқатты. Мемлекеттік қызметкердің де, кәсіпкердің де, еріктілер мен үй шаруасындағы тұрғынның да басын біріктірген акция бәріне ортақ азаматтық жауапкершіліктің шын үлгісін паш етті. Айналаңды таза ұстау қолыңдағы қоқыс қалдығын арнайы орынға тастаудан басталады. Сайып келгенде, «Таза Қазақстан» тек қана сенбілік акциясы ғана емес, сонымен бірге, ол – мәдениет, тәрбие, тағылым.
Акция алдағы уақытта да жалғасатын болады. Бүгінде «Таза Қазақстан» акциясы бүкіл ел тұрғындарын қоршаған ортаны қорғап, табиғатты аялауға үйрететін үлкен мектеп, дәстүрлі шараға айналып үлгерді.
ӨЗ ТІЛШІМІЗ
