Ұйғыр ауданының әкімі Бота Елеусізова бастаған жергілікті мәслихат депутаттары, қоғамдық кеңес мүшелері, бөлім басшылары Шонжыдағы бірқатар құрылыс нысанын аралап, жұмыстың сапалы әрі уақытылы орындалуын қадағалады.
Алғашқы нысан аудандық кітапхана болды. Ғимараттың күрделі жөндеуден өтуіне мемлекеттен 281 миллионнан астам қаражат бөлінген. «Consulting Company» ЖШС жеңімпаз атанған соң жұмысты өзге компанияға қосымша келісімшартпен берген екен. Құрылыс ақпан айында басталған. Бірақ біз барған тұста мұнда небәрі 8 адамның ғана жұмыс істеп жүргенін аңғардық. Биыл желтоқсан айында өткізілуі қажет нысанның әлі күнге ауы мен бауы бітпеген. Мердігер компанияның өкілі құрылыс материалдарын күтіп отырғандарын, келген бетте бірден қауырт жұмыс басталатынын айтып ақталған сыңай танытты. Десе де бөлінген қаражаттың жартысына жуығы мердігердің есебіне аударылып та қойған. Облыстық мәдениет басқармасы арқылы жүргізіліп отырған құрылыс жұмысының әлі де өте төмен дәрежеде екеніне көз жеткізген халық қалаулылары мен қоғамдық кеңес мүшелері күнделікті бақылауды күшейту қажет деп тапты. Бөлінген қаражаттың діттеген орнына жұмсалып, жұмыстың сапалы жүргізілуі халық игілігі үшін екенін мердігерлерге ескертіп, әрмен қарай жолға шықты.
Биыл Шонжы ауылында жалпы ұзындығы 2,8 шақырым жол жасалуда. 129 миллион теңге қазына қаржысынан бөлінген. «МФК KZ» атты мердігер бүгінде Қыдырбаев, Уәлиханов, Қарақұл батыр, Талқанбаев және Абай көшесінің шығыс жағын жасауды қолға алыпты. Арнайы комиссия Қыдырбаев көшесіндегі жұмыс барысымен танысты. Мердігердің кемшіліктерін айтты, сапаға барынша мән беру керегін ескертті. Сондай-ақ жуырда 40 баспана кезектегі азаматтарға берілмек. Әрқайсысы 64 шаршы метр аумақты құрайтын бұл пәтерлер аудан бойынша үй кезегінде тұрған жандардың игілігіне берілмек. «Строй Индустрия» ЖШС салған құрылыс жұмысы 2024 жылы басталып, биыл наурызда аяқталған. Дегенмен, кеткен кемшілік шаш-етектен. Едендердің түзу еместігі, есіктердің жабылмай қалуы сынды олқылықтар өте көп. Келген комиссия бәрін көзбен көріп, мердігер компанияның өкілдеріне қатаң ескерту жасады. Әр кемшілік жойылмайынша, нысан қабылданбайтынын қадап айтты.
Бұдан соң халық қалаулылары мен қоғамдық кеңес мүшелері аудан орталығында басталған су құбырының жөндеу жұмыстарымен, ХҚКО-ның құрылысымен және демеушілер есебінен шатыры жөнделген көпқабатты тұрғын үйлердің жағдайымен танысты. Мемлекет қоржынынан бөлінген әр тиын халықтың игілігі үшін екені анық. Осыны естен шығармаған Қарадаладағы белсенділер алдағы уақытта да әр нысанның сапасын бақылауда ұстайтындарын айтып тарқасты.
Анар ДҮЙСЕНБАЙҚЫЗЫ
Ұйғыр ауданы
