Қарасай ауданына қарасты Қырғауылды ауылындағы «Анаға құрмет» музейінде халықаралық шара өтті. «Болашақ музейлері: цифрландыру және мәдениетаралық диалог» атты коллоквиумда мәдениет, тарих және технология саласының үздік сарапшылары бас қосты.
Аталған шараны Қазақстан Республикасының Мәдениет және ақпарат министрлігі мен ТҮРКСОЙ қолдап, ЮНЕСКО жанындағы Мәдениеттерді жақындастыру орталығы және бірқатар мәдени мекеме ұйымдастырды. Коллоквиум – музей ісінің жаңа дәуіріне жол ашатын ашық алаң. Мұнда музейлерді заманауи технологиялармен жабдықтау, тарихи-мәдени мұраны жаңаша ұсыну және мәдениетаралық байланыстарды нығайту мәселелері көтерілді.
Шара бағдарламасы ерекше мазмұнға толы болды. Қонақтар мұражай ішіндегі экспозицияларды аралап, суретші Аманқос Ақанаев пен реставратор Қырым Алтынбековтің еңбектерімен танысты. Сонымен қатар археологиялық жаңғырту жұмыстарын тамашалап, музей кітапханасының ашылуы өткізіліп, соңы «Музейге кітап сыйла» акциясына жалғасты.
Ғылыми-тәжірибелік сессияда халықаралық сарапшылар музей ісінің рөлі, этнографиялық зерттеулер, жасанды интеллектіні пайдалану және цифрлық трансформация стратегиялары туралы баяндады. Олардың қатарында ТҮРКСОЙ өкілдері, Түркиядан келген музей жетекшілері және Қазақстанның белгілі ғалымдары болды. Шара соңында қатысушыларға ТҮРКСОЙ мен ЮНЕСКО сертификаттары табыс етіліп, мәдениет саласына үлес қосқан қызметкерлер марапатталды.
Аталған шарадағы ең басты жаңалық – «Анаға құрмет» музейі Түркі мәдениеті халықаралық ұйымының (ТҮРКСОЙ) музейлер құрамына №51 реттік нөмірімен қабылданды. Арнайы сертификатты ТҮРКСОЙ Музейлер одағының бас үйлестірушісі, тарих ғылымдарының докторы Джавид Мовсюмлю табыстады.
Бұл жиын – музей ісін жаңғыртып, цифрлық технологияларды енгізу арқылы тарихи-мәдени мұраны жаңа қырынан таныстыруға жол ашатын маңызды қадам болатыны анық.
Қуат Қайранбаев
Қарасай ауданы