Жыл басынан бері облыс бойынша 1494 адам қандас мәртебесін алды. Облыс әкімі Марат Сұлтанғазиев елге қоныс аударған қандастарға мемлекеттік тілді оқыту және бейімдеу шараларын тиімді ұйымдастыру жөнінде нақты тапсырма берді.
Осыған орай облыстық «Тіл» оқу-әдістемелік орталығының аудандық және қалалық филиалдарында мемлекеттік тілді оқытумен қатар «Бір терезе» қағидаты негізінде әлеуметтік көмек алу, кәсіптік дағдыларын жетілдіру, құқықтық сауатын арттыру бойынша кешенді жұмыстар жүргізілуде. Облыстық «Тіл» оқу-әдістемелік орталығының Қарасай аудандық филиалында қандастарға арналған арнайы топтар ашылып, жүйелі тіл сабақтары өтуде. Қазіргі таңда филиалда екінші жартыжылдық бойынша іс жүргізу курсында 30 адам, екі топ құрылып, тыңдаушылар тұрақты түрде білім алуда. Оқу мерзімі – 3 ай.
Жобаның негізгі мақсаты – қандастардың мемлекеттік тілді еркін меңгеруіне жағдай жасау, сөйлеу, түсіну, жазу және тыңдау дағдыларын дамыту. Бұл тек тіл үйрету ғана емес, сонымен бірге олардың мәдениетіміз, дәстүріміз, тарихымызбен жақын танысуына мүмкіндік береді. Сабақта тыңдаушылар қазақ тіліндегі тұрмыстық қарым-қатынас үлгілерін меңгеріп, күнделікті өмірде колдана алатындай деңгейге жетуді көздейді. Оқыту процесі заманауи әдістеме, көрнекі кұрал және интерактивті тәсілдермен жүргізіледі. Әр топ апта сайын онлайн форматта жиналып, ауызекі сөйлесуді жаттықтырады, тақырыптық мәтіндермен жұмыс істейді, ұлттық мереке кезіндегі іс-шараларға катысады. Мұндай сабақтарда тек тіл ғана емес, қазақ халқының салт-дәстүрі, ұлттық тағамы, тарихы мен өнері жайлы да мол мағлұмат беріледі. Қандастар сабаққа зор қызығушылықпен қатысып, үй тапсырмасын да тиянақты орындауға тырысып жүр.
«Атамекен» кәсіпкерлік палатасы және мансап, көші-қон, халыққа қызмет көрсету орталығы мамандарымен қандастардың мемлекеттік тілді меңгеруіне қолдау көрсету, мемлекеттік және қоғамдық бағдарламаларды түсіндіру, құжаттардың мерзімі, толтырылуы туралы ақпарат беру, әлеуметтік және құқықтық, тілдік тұрғыда бағдар беру мақсатында іс-шаралар өтті.
Қазақстанда ресми құжат айналымы, бұқаралық ақпарат құралдары, білім беру және іс жүргізу кирилл графикасында қалыптасқан. Сондықтан бұл әліпбиді үйрену қандастардың күнделікті өмірге тез бейімделуіне септігін тигізеді. Мұндай игі бастама – ел бірлігін нығайтып, болашағымыздың берік болуына кызмет ететін қадамдар.
Жанар Оразалиева,
Алматы облыстық «Тіл» оқу-әдістемелік орталығы
Қарасай аудандық филиалының меңгерушісі
