Қонаев қаласында «Таза Қазақстан» экологиялық акциясы аясында сенбілік өтті. Шараға мемлекеттік мекеме қызметкерлері, белсенді жастар, Балаларды қолдау орталығының тәрбиеленушілері, ардагерлер де қатысты. Онда қоршаған ортаны жасыл желекке орап, қаланы көркейту мақсатында көшет отырғызылды.
Алдымен мамандар тораңғы көшетін дұрыс отырғызу тәсілін көрсетіп берді. Ағаштың бұл түрі ерекше күтімді қажет етеді. Түбіне ауа кірмеуі керек және тамырдың сыртқа шығып қалмауы маңызды. Осындай ұсақ-түйек жайттардың өзі ағаштың жайқалып өсуіне не мүлде қурап қалуына әсер ететін көрінеді. Тораңғы көшеттері Еңбекшіқазақ ауданындағы тәлімбақтан әкелінген. Онда сұрыптаушылар құрғақ әрі құмды топыраққа бейімделген жіңішке жапырақты ағаш түрлерін өсіреді.
Шараға облыс әкімі Марат Сұлтанғазиев те қатысып, көшет отырғызу ісіне атсалысты.
– Облысымызда ағаш отырғызу акциясы көктемнен бері үзбей жүргізіліп келеді. Биыл облыста 80 мыңға жуық ағаш отырғызылып, бірнеше тонна тұқым егілді. Бұл шара сол жұмыстардың қорытындысы болды. Одан бөлек өткен жылдан бастап балаларды еңбекке баулып, еліміздің тазалығына үлес қосуы үшін әр мектеп оқушысы өз кабинетіне ағаш тұқымын егіп, көшет өсіруде. Облыста 360 мыңдай оқушы болса, әрқайсысының өзінің ағашы бар. Бұл акция әлі де жалғасады. Алдағы уақытта өңіріміздің табиғи ерекшелігіне сай келетін ағаш түрлерін өсіруге арналған агроөнеркәсіптік аймақ құруды жоспарлап отырмыз. Қазір мамандар осы жобаны іске асыру үшін ең қолайлы орынды таңдауда. Сондай-ақ акцияға Қонаев қаласындағы Балаларды қолдау орталығының тәрбиеленушілері де атсалысты. Олар Қонаевқа көшіп келіп, мектеп ауыстырған соң жаңа қоныстарына тез бейімделіп, тіл табысып кетуіне көмектесуіміз керек. Балалар шараға белсене қатысуда, – деді Марат Елеусізұлы.
Қонаев қалалық «Жастар рухы» жастар қанатының төрағасы Мейіржан Жансерік облыс жастарының мұндай шаралардан қалыс қалмайтынын айтты. «Көшет отырғызу – тек табиғатты көркейту ғана емес, бұл келешек ұрпақтың жайлы өмірі үшін жасалған игі бастама, елге деген сүйіспеншіліктің белгісі», – деді ол. Облыстық Қазақстан халқы Ассамблеясы кеңесінің мүшесі Лариса Котельникова мұндай акциялар ұрпақ сабақтастығының символына айналатынына тоқталды. «Соңғы уақытта облыс орталығы жайқалып келеді. Жаңадан отырғызылған жасыл желекке қарап, көңілің жай табады. Бұл – келешек қауымға деген қамқорлықтың көрінісі. Шарада жастардың ерекше белсенділігін байқадым. Олар ертең осы ағаштарға қарап, жастық шағын есіне алады, өзі балаларына айтып, үлгі де болады», – деді ол.
Облыстық тұрғын үй-коммуналдық шаруашылығы және абаттандыру басқармасы басшысы Димаш Қожабековтің айтуынша, акцияға облыс бойынша 67 мыңнан астам адам қатысқан. Бір күн ішінде 1200 гектардан астам жер тазартылып, 800 тоннадан аса қоқыс шығарылған. Сонымен қатар 7000-нан астам тораңғы, үйеңкі, шаған және терек ағаштарының көшеті отырғызылған.
Шара барысында облыс әкімі Марат Сұлтанғазиев Қонаев қаласындағы Балаларды қолдау орталығына арнайы барып, тәрбиеленушілермен бірге ғимарат маңына да көшет отырғызып, жидек ағашының тұқымын екті. Балалармен бірге түстеніп, олардың өнерін тамашалады. Орталық тәрбиеленушісі 13 жастағы Раина Манталиева алғаш рет ағаш отырғызғанын, бұл сәттің есінде ұзақ уақыт сақталатынын және қоршаған ортаның тазалығына атсалысқанына қуанышты екенін айтты.
«Атадан мал қалғанша, тал қалсын» дейді дана халқымыз. Акция барысында отырғызылған көшеттер алдағы уақытта жайқалып өсіп, таза ауамен тыныстауымызға мүмкіндік беріп, қала көркін аша түспек.
Гүлзат БАЙҚОНЫСОВА
Қонаев қаласы
