Кеген аудандық балалар мен жасөспірімдер спорт мектебінде қазақ күресінен жасөспірімдер арасында әлемнің екі дүркін, Азияның үш дүркін жеңімпазы, ҚР еңбек сіңірген жаттықтырушысы Бауыржан Тәліптің жүлдесіне арналған республикалық турнир өтті.
Аталған жарыста еліміздің әр аймағынан келген 279 жас балуан 10 салмақ дәрежесі бойынша бақ сынады. Турнирдің ашылу салтанатында Кеген ауданы әкімінің орынбасары Медет Исаев қатысушыларға сәттілік тіледі. Бауыржан Таубалдыұлын аудан әкімінің Алғыс хатымен марапаттап, иығына шапан жапты. Спортшының жаттықтырушысы, ақын Шеризат Мекебаев арнау өлеңін оқып, жас балуандарға ақ батасын берді. Шараға арнайы келген қонақтар – Қазақ күресі федерациясының тұңғыш президенті, профессор Ерғали Мұхидинұлы, қазақ күресі және самбо спортының шебері, Алматы облысының Құрметті азаматы Мұқи Жантелі, дзюдо мен самбо күресінен Еуропа және Азия жеңімпазы Айсара Керімбекова Бауыржанның спорттағы жетістігіне жан-жақты тоқталды.
Екі күнге созылған жарыс қорытындысы бойынша І орынды Алматы облысы, ІІ орынды Алматы қаласы, ІІІ орынды Маңғыстау облысының балуандары иеленді.
Жеңімпаздар мен жүлдегерлерге арнайы кубок, медаль, диплом, ақшалай сыйлықтар табысталды. Ең бастысы, бозкілем шеберлері балуандар турнирі аясында мол тәжірибе жинақтады.
Дәурен ӘБУТӘЛІПОВ
Кеген ауданы
