Жасөспірімдер арасында ауыр атлетикадан облыстық чемпионат өтті. Аталған жарысқа аймақтағы төрт аудан мен Алматы қаласынан 50-ден астам спортшы қатысты. Турнирдің мақсаты – жасөспірімдер спортын дамыту, талантты ауыр атлеттерді анықтау және салауатты өмір салтын насихаттау.
Алматыда өткен сайыста 17 жасқа дейінгі зілтеміршілер бақ сынады. Ауыр атлетикадан облыстың аға жаттықтырушысы Жасұлан Қыдырбаевтың айтуынша, мұндай жарыстар жас спортшылардың мол тәжірибе жинап, жетістіктерге жетуіне мүмкіндік береді.
«Жарыс жоғары деңгейде ұйымдастырылды. Қатысушылардың шеберлігі көңілімізден шықты. Спортшылардың тыңғылықты дайындалуына барынша жағдай жасау қажет. Сонда ғана үздік нәтижеге қол жеткіземіз. Байрақты бәсекелерде ел намысын қорғайтын ерлер көп болсын!» – деді ол.
Чемпионат қорытындысы бойынша, үздік спортшылар Алматы облысы құрамасына іріктеліп, осы айдың соңында Талдықорғанда өтетін Қазақстан чемпионатына қатысады.
– Бұл чемпионат оңай болған жоқ, бірақ мен бар күш-жігерімді салып, жеңіс тұғырына көтерілдім. Ендігі мақсат – ел біріншілігінде сәтті өнер көрсету, – дейді 50 келі салмақ дәрежесінде «Шаңырақ» спорт клубының намысын қорғаған Сәулебай Ералы.
Облыстық чемпионатта «Шаңырақ» спорт клубынан Серғазы Медет және Төрехан Ағаділ, «Жігер» спорт мектебінен Қази Қайсар, Еркебұлан Кенжеғали, Мұқағали Кенжеғали және Александр Луканенко, республикалық спорт колледжінің атлеттері Нұрғали Қайнар, Мұрат Еран, Қонысбек Ерлан, Ділдәбек Бекасыл, Талғар ауданынан Көкбай Бекарыс өз салмақ дәрежесінде үздіктер қатарынан көрінді.
Өз тілшіміз
