Ақыл-ойдың алыбы атанған ұлы Абайдың 180 жылдығына орай игілікті іс-шаралар әлі де жан сүйсінерлік жағдайда жалғасын тауып келеді. Абай тойы жыл аяғына дейін және одан әрі де ұлан-асыр мерекеге ұласа беретініне сенім зор. Өйткені, халық үшін дана Абай – мәңгілік тақырыптың алтын арқауы.
Алатау қаласы әкімдігінің бастамасымен «Жаңаталап» ықшамауданындағы №10 орта мектепте ұлы ақынның мерейтойына байланысты FIDE рейтингі есепке алынатын шахмат жарысы өтті. Жарысқа облыстың қала-аудандарынан және Қырғыз елінен 122 шахматшы қатысты. Тартысқа толы бәсекені тамашалауға келген көрермен көп болды. Швейцар жүйесімен өткен 9 турлық жарыстың қорытындысында жүлделі бірінші орынды Алматы қаласынан келген Мұхтар Айнақұл, екінші, үшінші орындарды ілелік Тайыр Айдынұлы мен Мағжан Мұратұлы иеленді. Сондай-ақ, жүлделі орындардан қарасайлық Даниял Қабылбек, талғарлық Дінмұхамед Меліс, Қырғызстаннан Әсел Лесбаева, алматылық Мәди Амангелдіұлы көрінді. Олар өздерін қандай бәсекеге болсын дайын екенін байқатты.
Жарыс барысында 65 жастан асқан ардагерлер де өздерінің өмірлік тәжірибелерін ортаға салды. Олардың арасынан суырылып алға шыққан, шеберліктері толысқан ойыншылар да аз болмады. Жарыстың нәтижесінде бірінші орынды қарасайлық Тұрғали Жолдасов, екінші орынды талғарлық Ахат Солтанқұлов, үшінші орынды қарасайлық Кенжебек Ермекбаевтар иеленсе, әйелдер арасынан бірінші орынды қарасайлық Мәриям Нұрымова, екінші орынды Алатау қаласынан Інжугүл Ахметова жеңіп алды.
Осынау жарыста таудай талабымен көрінген 8 жастағы балғындар да баршылық болып шықты. Мәселен, қарасайлық Әлисұлтан Қылыбек, Нұртуған Қылышев, талғарлық Дәрменияр Дәулет, Мәдина Қадыр, алатаулық Кәркен Аманғали, ілелік Құсайын Дадабаев, еңбекшіқазақтық Дәулет Нұрболатовтар келешегінен үлкен үміт күттіретін ойыншылар екенін көрсетті. Оларға Абай аталарының «Қара сөздер» кітабы сыйға берілді.
– Мен шахмат жарысында бастан-аяқ болдым. Басқа жарыстарға қарағанда, бұл жарыс ерекшелігімен әсер қалдырды. Жиналған жұртшылық Алатау қаласының әкімдігіне, Алатау қаласының шахматтан бас бапкері, Ауған соғысының ардагері Қармағаш Сейітов пен мектеп ұжымына айрықша алғыстарын білдірді, – дейді шахматтан спорт шебері әрі белсенді ұйымдастырушы, қарасайлық Абдолла Адимұратов.
Аталған шахмат жарысына Қарасай ауданының Шамалған ауылындағы кәсіпкер Рахат Алпысбаев қаржылай демеушілік жасап, шахматшылардың ризашылығына бөленді.
Қанат ТӘКЕБАЕВ
Алатау қаласы
