Аграрлы Балқаш ауданындағы суармалы жерлерді тіршілік нәрімен қамтамасыз етіп тұрған – Іле өзені. Кейінгі жылдары өзен деңгейі төмендеуіне байланысты суармалы егістік алқабын тіршілік нәрімен қамтамасыз ету басты мәселеге айналуда. Осы түйткілді шешу мақсатында Іле өзенінен арнайы қазылған «Тасмұрын» және «Бақанас» магистральды каналдарын тазалау жұмысы жыл сайын жүйелі атқарылып келеді. Ауқымды жұмыс биыл да өз жалғасын тауып, «Тасмұрын» және «Бақанас» магистральды каналдарының бастапқы сағаларына механикалық тазалау жұмысы жүргізілуде.
Балқаш ауданы әкімінің орынбасары Асқар Кәдірұлы мен ауыл шаруашылығы бөлімінің басшысы Бүркіт Мұқанов, «Алматыоблсушар» мекемесінің бөлімше басшысы, аудандық мәслихаттың депутаты Ердос Деңгелбаев «Бақанас» магистральды каналының бастапқы сағасына арнайы барып, ол жердегі атқарылып жатқан ауқымды жұмысты көзбен көрді.
Су жүйелерін тазалау жұмысына жауапты Ердос Деңгелбаев «Тасмұрын» магистральды каналының бас сағасын құм шөгінділерінен механикалық тазалау қыркүйек айының 21-і күні басталып, 10 қазанда толыққанды аяқталғанын айтты. Сонымен қатар 8 қазанда «Бақанас» магистральды каналының бастапқы сағасын механикалық тазалау жұмысы басталғанын, ол 10 қарашада аяқталатынын, қазіргі таңда бұл іске 10 жұмысшы, 4 құмтиегіш, 2 экскаватор, 1 бульдозер, тағы да басқа арнайы техникалар жұмылдырылғанын айтты.
«Қазіргі таңда тазаланып шығарылған құм шөгіндісінің көлемі – 316 мың тонна. Атқарылып жатқан жұмыс 2026 жылдың вегетациялық кезеңіне ауқымды дайындық іс-шаралары қатарына жатады. Яғни ауданымыздың су пайдаланушы шаруашылықтарына суармалы егіс алқабына қажетті суды уақытында және ысырапсыз жеткізіп беру көзделуде», – деді ол.
Асқар Кәдірұлы жоғарыда аталған су жүйелерін тазалау жұмысы жыл сайын өз деңгейінде сапалы атқарылып тұрса, егістік алқабына дәнді дақылдарды, соның ішінде күріш дақылын егу айтарлықтай қиындық туғызбайтынын айтып, ауқымды жұмысты жүйелі жүргізіп жатқан мекемеге өз істеріне жауапкершілікпен қарау қажеттігін ескертті.
Ақ күріш – ауданымыздың байлығы. Сондықтан да оған қажетті су мөлшері жеткілікті болғаны абзал. Ал судың мол болуы жоғарыдағы аталған каналдарға тікелей байланысты. Жұмыс өз деңгейінде атқарылатын болса, тіршілік нәрі де мол болмақ.
Бақтығали ДӘУІТБАЕВ
Балқаш ауданы
