Халқымызда «Бір жылдығын ойлаған бидай егеді, жүз жылдығын ойлаған ағаш егеді» деген аталы сөз бар. Расында, туған жерді көгалдандыру – баршамызға ортақ іс, әрі келешек ұрпақтың жарқын болашағы үшін жасалған үлкен қадам. Осыған орай Кегендегі «Жастар» саябағында өңірдің тазалығы мен экологиялық мәдениетін арттыру мақсатында дәстүрлі «Таза Қазақстан» республикалық акциясы өтті.
Игі шараға Кеген ауданының әкімі Нұрбақыт Теңізбаев қатысып, көпшілікпен бірге ағаш көшеттерін отырғызды. Акцияға ауылдық округ әкімдері, қоғамдық ұйым өкілдері мен аудан тұрғындары атсалысты.
– Әрбір азамат туған жеріне жанашырлықпен қарап, қоршаған ортаның тазалығына үлес қосуы қажет. Аталған акция – тек айналаны көркейту үшін қолға алынған жұмыс емес, бұл – елдік мүдде, ұрпақ қамы үшін атқарылып жатқан іс. Әрбір егілген көшет – болашақтың тынысы. Жасыл белдеуді көбейту – біздің ортақ міндетіміз, – деді Нұрбақыт Молдахметұлы.
Акцияға қатысқан аудандық ақсақалдар алқасының төрағасы Көпжасар Нұрлыбай бұл шараның тәрбиелік маңызы жоғары екенін атап өтті.
– «Таза Қазақстан» акциясы әр азаматтың өз ауылын, ауласын, мектебін, көшесін таза ұстауға үндейді. Біз жастарға экологиялық тәрбие берудің маңызын насихаттауымыз керек. Мектеп оқушылары осы бастан табиғатты аялауға дағдыланса, олардың елге, жерге деген сүйіспеншілігі де арта түсетіні анық, – дей келе баршаны тазалықты сақтау, экологиялық мәдениетті қалыптастыру жолында бірлесіп еңбек етуге шақырды. Сондай-ақ ол Кеген ауылы маңындағы «Түменбай» бастауын қоршап, шағын саябаққа айналдырсақ деген ұсынысын да жеткізді.
Экологиялық акцияға аудандық жастар ресурстық орталығының еріктілері де белсене қатысты. Аудандық тұрғын үй-коммуналдық шаруашылығы және тұрғын үй инспекциясы бөлімінің басшысы Бек Әбдіманаповтың айтуынша, өңірде 30 қарағай, 20 сирень, 49 арша, қарағаш, 190 шырша, 400 жеміс ағашы, 3110 тал-терек егілген.
Акцияға қатысушылар «Жастар» саябағы аумағын көгалдандырып, жас көшеттермен көмкерді. Сөйтіп, олар бір күннің еңбегін мың күннің игілігіне айналдырды.
Дәурен ӘБУТӘЛІПОВ
Кеген ауданы
